Қашқадарёда йўловчи автобус ағдарилиб кетди

Автобус ҳайдовчиси бошқарувни йўқотган.

Фото: Ижтимоий тармоқлар

Қашқадарё вилояти ИИБ ахборот хизматининг хабар беришича, бугун, 2022 йил 7 ноябр куни соат 09:45ларда 4К-307 Шаҳрисабз-Мираки автомобил йўлининг 1-километрида йўловчи автобус иштирокида йўл-транспорт ҳодисаси содир бўлган.

Шаҳрисабз тумани йўналишидан ҳаракатланиб келаётган Isuzu ҳайдовчиси Н.А. рул бошқарувини йўқотган ва автобус ағдарилиб кетган. Ҳодиса оқибатида тан жароҳати олганлар йўқлиги айтилган.

Қашқадарё вилояти Транспорт бошқармаси мазкур воқеа бўйича қуйидагиларни қўшимча қилди.

Давлат рақами 70 N 201 FA бўлган Isuzu автобуси юридик жиҳатдан «Кеш-тур транс» МЧЖга қарашли бўлиб, Шаҳрисабз шаҳридан Шаҳрисабз туманининг Қутчи қишлоғига доимий йўловчи ташиган. Ушбу транспорт воситасининг йўловчи ташиш ҳуқуқини берувчи лицензия варақаси мавжуд.

Маълум бўлишича, йўл-транспорт ҳодисаси вақтида автобус салонида 10 дан ортиқ йўловчи бўлган, уларга жиддий зарар етмаган.

Ҳолат бўйича ҳуқуқ-тартибот органлари томонидан суриштирув ишлари олиб борилмоқда.

Аввалроқ, Тошкентда автобус ва 2 та енгил автомобил тўқнашганди. Самарқандда хорижий сайёҳлар ўтирган автобус ЙТҲга учраган. Ҳодиса оқибатида автобус ҳайдовчисининг шериги воқеа жойида ҳалок бўлган, Руминия фуқароси тан жароҳатлари олганди.