Қатар раҳбарияти ЖЧ-2022 бошланишидан олдин Германия ҳукуматининг танқидидан норозилик билдирди. FAZ нашрига берган интервьюсида амирлик ташқи ишлар вазири футболга энергетика сиёсатига алоқадор мезонлар қўлланаётганини айтди.
Қатар ташқи ишлар вазири Муҳаммад бин Абдул Раҳмон Ол Таний Берлинни мамлакатнинг футбол бўйича 2022 йилги жаҳон чемпионатига мезбонлик қилиш ҳуқуқи танқид остига олингани муносабати билан «икки томонлама стандартлар»да айблади. Бир томондан, «ҳукумат сиёсатчилари немис аҳолисига нотўғри маълумот бермоқда», деди у 6 ноябрь, якшанба куни Frankfurter Allgemeine Zeitung (FAZ) газетасига берган интервьюсида. Бошқа томондан, вазирнинг сўзларига кўра, Германия ҳукумати Қатар билан энергия соҳасида ҳамкорлик қилиш ёки Афғонистондан немис фуқароларини қутқариш борасида ҳеч қандай муаммога дуч келмаяпти.
«Биз жаҳон чемпионатини ўтказмоқчи бўлганимизда ва лаҳзадан завқланиб, уни немис жамоаси билан нишонламоқчи бўлсак, тўсатдан бошқа стандартлар қўлланади», деди Ол Таний. Унинг қайд этишича, Қатар ҳар доим конструктив танқидга очиқ. Аммо «биз билан гўё ҳамкорлик қилаётган» ҳамда барча воқеа ва ислоҳотлардан хабардор бўлган ҳукумат ёлғон маълумотларга асосланган баёнотлар бериб, ёлғон манзара яратса, «биз бунга чидай олмаймиз», деди ташқи ишлар вазири.
Доҳа Германия ички ишлар вазири Ненси Фазернинг Халқаро футбол федерацияси (ФИФА)нинг 2022 йилги жаҳон чемпионатини ушбу араб давлатида ўтказиш тўғрисидаги қарори адолатли эканлиги борасидаги баёнотидан норози бўлди. «Биз Германия ҳукумати сифатида бундай ҳуқуқ - мамлакатда йирик спорт тадбирларини ўтказишни топширишни ўта мураккаб масала деб биламиз», — деди вазир 27 октябр куни ARD давлат-ҳуқуқий телеканали эфирида.
Модераторнинг 2022 йилги жаҳон чемпионатини Қатарда ўтказиш ҳақидаги аниқ саволига жавоб берар экан, Фезер шундай таъкидлади: «У ерда амал қилиш керак бўлган мезонлар бор ва йирик спорт мусобақаларини ўтказиш ҳуқуқи бундай давлатларга берилмаса, яхши бўларди».
Фезер, шунингдек, Қатар ҳукуматидан айрим фуқаролар учун хавфсизлик кафолатларини талаб қилди. Ол Танийнинг сўзларига кўра, «ҳамма кутиб олиниши ва ҳеч ким камситилмаслиги» юқори даражада бир неча бор такрорланган. Ҳуқуқ-тартибот органлари «агар мухлиснинг хавфсизлигига зўравонлик туфайли хавф туғилса»гина аралашиш бўйича аниқ кўрсатмаларга эга», деди у.
Немис ОАВнинг хабар беришича, 28 октябрь куни Қатар ТИВ Германиянинг мамлакатдаги элчиси Клавдиус Фишбахни Ненси Фезер баёнотлари туфайли норозилик нотасини топшириш учун чақирган. Қатар немис вазирининг баёнотидан «хафа бўлгани» ва унинг позициясини «бутунлай рад этишини» эълон қилди.
Айни пайтда, Қатар билан бирга Баҳрайн, Кувайт, Уммон, Саудия Арабистони ва Бирлашган Араб Амирликларини ҳам ўз ичига олган Форс кўрфази араб давлатлари ҳамкорлик кенгаши Фезернинг танқидини рад этиб, Берлинни минтақа мамлакатлари ички ишларига аралашишдан огоҳлантирган ҳолда баёнот берди.
1 ноябрь куни якунланган Қатарга икки кунлик ташрифидан сўнг Фезер Қатар бош вазири унга 20 ноябрда бошланадиган жаҳон чемпионатида мухлислар хавфсизлиги учун кафолатлар берганини айтди.
