Қашқадарёда ёнғинни ўчиришга чақирилган ёнғин-қутқарув машинаси ЙТҲга учради

Қашқадарё вилояти Фавқулодда вазиятлар бошқармаси ахборот хизматининг хабар беришича, бугун, 2022 йил 25 ноябр куни соат тахминан 18:25 ларда Шаҳрисабз шаҳар ФВБга шаҳарнинг Катта навқат кўчасида дарахт ёнаётгани тўғрисида хабар келиб тушган. 

Шундан сўнг 4-сонли ёнғин-қутқарув бўлимидан Isuzu русумли ёнғин-қутқарув машинаси воқеа жойига жўнаган. Махсус машина ҳаракатланиб бораётган вақтда Шаҳрисабз шаҳрининг Ипак йўли ва Тарағай Баҳодир кўчалари чорраҳасида қарама-қарши йўналишдан келаётган Cobalt машинаси билан тўқнашув содир бўлган.

Оқибатда, Cobalt машинаси ҳайдовчиси тан жароҳати олиб шифохонага ётқизилган. Ҳозирда ҳолат бўйича суриштирув ишлари олиб борилмоқда.