Эрдўған Путин ва Зеленский билан телефон орқали мулоқот қилади

Туркия президенти Ражаб Тоййиб Эрдўған 4 январь куни Россия етакчиси Владимир Путин, шунингдек, Украина давлат раҳбари Володимир Зеленский билан телефон орқали мулоқот қилади. Бу ҳақда туркиялик сиёсатчининг матбуот котиби Иброҳим Калин 3 январь, сешанба куни NTV телеканалига маълум қилди.

Анқара Россиянинг Украинага қарши урушини ҳал қилиш учун Москва ва Киев билан Ташқи ишлар, Мудофаа вазирликлари раҳбарлари ва разведка хизматлари раҳбарлари даражасида интенсив дипломатик алоқаларни давом эттирмоқда, дея қўшимча қилди Калин. 

Унинг эслатишича, Туркия икки давлат вакилларининг музокара столида учрашувларини ўтказишга муваффақ бўлган ягона давлатдир. 

Дастлаб Анталияда, кейин Истанбулда учрашувлар бўлиб ўтди, дея эслатди Калин. 

Шундай қилиб, 2022 йил 10 март куни Анталиядаги дипломатик форум доирасида Россия ва Украина ташқи ишлар вазирлари Сергей Лавров ва Дмитрий Кулеба ўртасида музокаралар бўлиб ўтди. Кейинчалик, 2022 йил 29 ва 30 март кунлари Россия Федерацияси ва Украина делегациялари Истанбулда мулоқот қилди. 

Эрдўғаннинг вакили учрашувлар давомли бўлмаганидан афсусда эканини билдирди. Туркия президенти икки давлат раҳбарларини бир неча бор учрашишга чақирди, деди Калин. «Биз ушбу таклифни давом эттирамиз», дея қўшимча қилди матбуот котиби. 

Туркия президентининг матбуот котиби, шунингдек, «Россия ва Украина ўртасидаги урушни чуқурлаштириш» хавфи жуда юқори эканлигидан огоҳлантирди. 

Россия етакчисининг матбуот котиби Дмитрий Песков 3 январь куни «суҳбат режалаштирилганлигини» тасдиқлади. 

Ражаб Тоййиб Эрдўған 2022 йил 11 декабрь куни Владимир Путин билан телефон орқали гаплашди. Ўшанда Туркия раҳбари Қора денгиз орқали экспорт қилиш бўйича келишувни Украина ғалласидан ташқари бошқа товарларга ҳам кенгайтиришни хоҳлаётганини айтди. 

Кремлнинг маълум қилишича, Путин ва Эрдўған «Қора денгиз портларидан Украина ғалласи ҳамда Россия қишлоқ хўжалиги маҳсулотлари ва ўғитларини экспорт қилиш бўйича 22 июлдаги Истанбул келишувларининг бажарилишини кўриб чиққан». 

«Келишув мураккаб характерга эга бўлиб, у энг муҳтож мамлакатлар эҳтиёжларини қондириш учун Россиядан тегишли етказиб бериш йўлидаги тўсиқларни олиб ташлашни талаб қилади», — деб хабар берди Россия Федерацияси президенти девонида. 

Шу куни Туркия президенти Украина раҳбари билан телефон орқали гаплашди. Ражаб Тоййиб Эрдўған Запорижжя атом электр станцияси атрофидаги кескинликнинг тезроқ юмшатилишига умид билдирди. «Мен украиналик болаларнинг бошпанаси ва шаҳарларимиз учун юзлаб генераторлар учун миннатдорчилик билдирдим», — деб таъкидлади Украина президенти суҳбат якунлари бўйича Telegram’да. 

Ўша куни Европа Иттифоқи Туркия ҳукуматини Россияга нисбатан савдо сиёсатини ўзгартиришга ва Украинага кенг кўламли қуролли босқин учун Москвага киритилган Ғарб санкцияларига риоя қилишга чақирди.