Тошкент ва Бухоро ўртасидаги «Афросиёб» қатновлари яна 5 кунга тўхтатилди

Тошкент ва Бухоро шаҳарларини боғловчи тезюрар «Афросиёб» поезди қатновлари яна беш кунга тўхтатилди. Бунга Ўзбекистонда давом этаётган аномал совуқ сабаб бўлди, деб хабар берди «Ўзтемирйўлйўловчи».

«Аномал совуқ об-ҳаво туфайли, йўловчи поездлар ҳаракат хавфсизлигини таъминлаш ва йўловчиларни ўз манзилларига етказиш давомида ноқулайликлар келиб чиқишининг олдини олиш мақсадида, «Тошкент – Бухоро – Тошкент» йўналишидаги «Афросиёб» электропоезди қатновларининг 16-20 январ кунидаги 5 та рейси бекор қилинади», дейилади хабарда.

Харид қилинган чипталарни темирйўл чиптахоналарида, электрон чипталарни chipta.railway.uz сайтида 100 фоиз қийматда қайтариш мумкин.

Шу билан бирга, «Афросиёб» рейслари бекор қилингани сабабли, 16-20 январ кунлари «Тошкент-Бухоро-Тошкент» йўналишида ҳаракатланадиган «Шарқ» тезюрар поездига қўшимча тўрттадан вагон уланадиган бўлди.

Бундан аввал «Афросиёб» поездининг Тошкент—Бухоро—Тошкент йўналишида 13-15 январ кунларига белгиланган 3 та рейси бекор қилинганди.