Тошкент вилоятида чорва молларни ўғирлаган шахслар ушланди

Жиноий гуруҳ аъзолари 2 хонадондаги чорвани ўғирлаб кетгани аниқланди.

Фото: ИИББ ахборот хизмати

Тошкент вилояти ҳудудида аҳолининг мол ва қўйларини ўғирлаш билан шуғулланган жиноий гуруҳ аъзолари ушланди. Бу ҳақда ИИББ ахборот хизмати хабар берди.

«Юқори Чирчиқ тумани, Файзобод маҳалласида яшовчи фуқаронинг ҳовлисидан 5 бош қўй номаълум шахслар томонидан ўғирлаб кетилганди. Орадан 4 кун ўтиб, ушбу маҳалланинг Қайтмас кўчасида яшовчи яна бир фуқаро хонадонидан ҳам 4 бош қўй ва 2 бош бузоқ ўғирланди. Ҳудудда ўтказилган тезкор суриштирув тадбирлари давомида ушбу жиноятларни 20-25 ёшлар орасидаги 6 нафар шахс содир этгани аниқланиб, процессуал тартибда ушланди», дейилади хабарда.

Дастлабки тергов жараёнида, биринчи ҳолат бўйича фуқарога етказилган 15 млн сўм моддий зарар ундириб берилган. Иккинчи ҳолатда ўғирланган 4 бош қўй ва 2 бош бузоқ жабрланувчига қайтарилган.

Қўлга олинган шахсларга нисбатан Жиноят кодексининг 169-моддаси, 3-қисми билан жиноят иши қўзғатилган.