Европа Иттифоқи Россиянинг қўшни давлатларига импортнинг кескин ўсишини текширади — FT

ЕИ, АҚШ ва Буюк Британия вакиллари санкцияларни четлаб ўтиш масаласини муҳокама қилишни режалаштирмоқда.

Фото: Picture Alliance/DPA

Европа Иттифоқи Россияга қўшни давлатлар билан савдо муносабатлари ҳажми сезиларли даражада ошгани масаласига қизиқмоқда.

Бу ҳақда Европа Иттифоқининг санкциялар бўйича янги тайинланган комиссари Дэвид О'Салливан Financial Times нашрига хабар берди.

«Биз Евроиттифоқдан Россияга савдо оқимининг кескин камайиб бораётганини ва учинчи давлатлар, айниқса, Россияга яқин давлатлар билан савдонинг ғайритабиий ўсишини кузатмоқдамиз», деди у.

О'Салливан сўзларига кўра, савдо оқимларидаги ўзгариш бўйича суриштирув бошланган. Энди Европа Иттифоқи ва ҳамкорлар, хусусан, АҚШ ва Буюк Британия вакиллари 23 феврал куни бўлиб ўтадиган учрашувда санкцияларни четлаб ўтиш масаласида фикр алмашмоқчи. Бу уларнинг назоратни кучайтиришга интилиши билан боғлиқ.

Европа тикланиш ва тараққиёт банки ҳисоботида айтилишича, Россияга қўшни давлатлар, хусусан Қирғизистон ва Арманистон Россиянинг Украинага тажовузкорлиги бошланганидан бери товарлар импортини сезиларли даражада оширган. Таҳлилчиларнинг фикрича, бу уларнинг Россия учун савдо воситачиси ролини ўз зиммасига олганидан далолат беради.

Аввалроқ, Россия жорий қилинган санкцияларга қарамай, Нидерландиядан микрочиплар сотиб олишда давом этаётгани маълум бўлган эди. Германиянинг Smart Impex компанияси ҳам Ғарб санкцияларини четлаб ўтиб, Россия бозорига микрочиплар етказиб беришда гумон қилинмоқда. Туркия ва Ҳонконгда ҳам микрочипларни етказиб бериш бўйича воситачи фирмалар ташкил этилган. Яқинда Хитой компанияси Россияга ракета ускуналари етказиб бераётганликда айбланган эди.

Bloomberg нашрининг ёзишича, Россия кир ювиш машиналари ва музлатгичларнинг микрочипларини кейинчалик ҳарбий техникада ишлатиш учун учинчи давлатлар орқали сотиб олмоқда. Натижада, Россияга учинчи давлатлардан маиший техника экспорти кутилмаганда кескин ошган.

Аввалроқ, Евроиттифоқ Россияга санкцияларни четлаб ўтишда учинчи давлатлар ёрдам бераётган бўлиши мумкинлигидан хавотирда экани, жумладан Европа Иттифоқидан Ўзбекистонга экспорт миқдори «шубҳали» тарзда ошаётгани айтилган эди.