Испания: НАТО аскарлари ҳеч қачон Украинадаги урушга бормайди

Испания қўшинлари «ҳеч қачон» Украинадаги урушда қатнашмайди. Бу ҳақда Испания мудофаа вазири Маргарита Роблес La Vanguardia газетасига берган интервьюсида айтиб ўтди.

Фото: US Army

«Бу мутлақо мумкин бўлмаган сценарий, у мавжуд эмас. Испания аскарлари фақат НАТО давлатларидан бирига тажовуз содир бўлган тақдирда аралашади. Ҳеч қачон, ҳеч қачон, НАТО давлатидан бирорта ҳам аскар бўлмайди. Испания ҳеч қачон Украинадаги урушда қатнашмайди», деди у.

Маргарита Роблес НАТО шартномасининг бандига ишора қилган. Унга кўра, иттифоққа аъзо давлат урушга фақат НАТОга аъзо бошқа давлат ҳужумга учраса ва ёрдам сўрасагина аралашади.

Аввалроқ НАТО Бош котиби Йенс Столтенберг Россияга рухсат этилган чегараларни бир марта ва охиригача кўрсатиб қўйишга чақирганди.

«Биз Россияга Европа хавфсизлигига путур етказишда давом этишига йўл қўя олмаймиз. НАТО Россиянинг агрессиясини бузиши ва тарих такрорланмаслигини таъминлаши керак», деди у 22 февраль куни Варшавада НАТОнинг Шарқий Европа саммитида.

Столтенберг Украинага қарши уруш бошланишидан олдин ҳам Россия 2008 йилда Грузияга ҳужум қилгани, 2014 йилда эса Украинанинг Қрим яриморолини аннексия қилиб, Донбасс сепаратистларини қўллаб-қувватлай бошлаганини эслатди.