Танзила Норбоева Жаҳон банки вице-президенти билан учрашди

Мулоқот чоғида ҳамкорликнинг амалий жиҳатларига эътибор қаратилиб, унинг истиқболлари хусусида фикр алмашилган.  

Хусусан, давлат корхоналарини хусусийлаштириш дастурини амалга ошириш, махсус иқтисодий зоналар фаолияти самарадорлигини ошириш, барқарор ривожланиш мақсадларига эришишда парламент, ҳукумат ва фуқаролик жамияти ролини кучайтириш, гендер тенглик соҳасида ҳамкорликни кенгайтириш масалаларига эътибор қаратилган. 

Бундан ташқари, Ўзбекистонда турли соҳалардаги лойиҳаларни амалга оширишда хорижий компанияларни жалб этиш борасида Жаҳон банкининг иштироки муҳокама қилинган.

Таъкидланишича, Анна Бьерде Ўзбекистонда иқтисодий янгиланишлар ижтимоий ислоҳотлар билан уйғун равишда олиб борилаётганини, шу жумладан ижтимоий инклюзивлик ва ижтимоий тенглик ёндашувлари асосида давлатнинг алоҳида стратегик мақсадлари белгиланганини қайд этган. Шунингдек, у Жаҳон банки бундан кейин ҳам Ўзбекистон билан ҳамкорликни янада кенгайтиришга интилишини маълум қилган.