Навоийда ўқитувчиларни «Ташаббусли бюджет» учун овоз тўплашга мажбурлаганлар жазоланди

Мактабларнинг мансабдор шахслари белгиланган тартибда маъмурий жавобгарликка тортилган.

Фото: Getty Images

«Ташаббусли бюджет» учун айрим соҳа вакилларининг овоз йиғиш ишларига жалб қилингани ҳолатлари Сенатнинг Одам савдосига ва мажбурий меҳнатга қарши курашиш комиссияси томонидан ўрганилган.

Ўрганиш натижаларига кўра, Навоий вилоятининг Хатирчи туманидаги 24-сонли ҳамда Навбаҳор туманидаги 9-сонли умумтаълим ўрта мактабларида раҳбарият томонидан ўқитувчиларнинг хизмат вазифасига кирмайдиган «Ташаббусли бюджет» лойиҳасига овоз йиғишга тарғиб қилгани ва мажбуран жалб қилгани ҳамда уларнинг ҳаракатларида Маъмурий жавобгарлик тўғрисидаги Кодекснинг тегишли моддаларида кўрсатилган ҳуқуқбузарлик аломатлари аниқланган.

Давлат меҳнат инспекцияси томонидан мазкур таълим муассасаларининг мансабдор шахслари белгиланган тартибда маъмурий жавобгарликка тортилган.

Комиссия мажбурий тарзда меҳнатга жалб этиш билан боғлиқ муаммога дуч келган ёки мазкур ҳолатдан хабардор бўлганлардан [email protected], 1176 ҳамда 1092 қисқа рақамли «ишонч телефон»ларига мурожаат қилишни сўрамоқда.