Уманда ҳалок бўлган болалар билан видолашув ва Донбассдаги қайноқ нуқталар. Уруш суратлари

Украинада урушнинг 431-куни ўтди. Асосий маълумотлар:

РФ мудофаа вазирлигида Сергей Шойгунинг таъминот бўйича ўринбосари ўзгарди — Михаил Мизинцев ўрнига Росгвардия раиси ўринбосари, генерал-полковник Алексей Кузьменков тайинланди.
Украина қуролли кучлари Севастополдаги нефт базада рўй берган ёнғинни Украинанинг қарши ҳужумига тайёргарликнинг «элементларидан бири» деб атади.
Брянск областида чегарадаги қишлоқ ўққа тутилиши оқибатида тинч аҳоли вакилларидан тўрт киши ҳалок бўлди.
Буюк Британия мудофаа вазирлиги разведка маълумотларига таянган ҳолда, россиялик командирлар интизомни бузганларни зиндонга (ер чуқур кавланиб, усти панжара билан ёпилган қамоқхона) ташлаётгани ҳақида хабар қилди.

Уман. Ракета зарбасидан ҳалок бўлган болаларнинг дафн маросими

28 апрелга ўтар кечаси Россия армияси Черкасс областининг Уман шаҳридаги тўққиз қаватли уйга ракета зарбаси йўллаганди. Украина ички ишлар вазири Игор Клименконинг маълумотига кўра, зарба оқибатида 23 киши ҳалок бўлган, жумладан олти бола ҳам — уларнинг уч нафари ўғил болалар (бир ярим, 16 ва 17 ёшларда) ва уч нафари қиз болалар (8, 11 ва 14 ёшларда). Зарба оқибатида 9 қаватли уйнинг 109 киши яшаган подъездида квартираларнинг ярми тўлиқ вайрон бўлган. Харобалар остидан 17 кишини қутқариб олишга муваффақ бўлинган. Яна икки аёл бедарак йўқолган деб ҳисобланмоқда.