Rossiya Ukraina shaharlariga yoppasiga raketa zarbalari yo‘lladi. So‘nggi ma’lumotlar

Rossiyalik harbiylar 28 aprelga o‘tar kechasi Ukraina bo‘ylab navbatdagi raketa zarbalari seriyasini amalga oshirdi. Dnipropetrovsk, Cherkass va Kiyev oblastlari, jumladan Kiyev shahriga zarbalar yo‘llangan. «Ukrenergo»dan xabar qilishlaricha, zarbalar energetika obektlariga kelmagan va elektr energiyasi iste’molida cheklovlar kiritilmaydi. Ukraina qurolli kuchlari bosh qo‘mondoni Valeriy Zalujniyning ma’lum qilishicha, Rossiya jami 23 ta qanotli raketa uchirgan, shundan 21 tasi urib tushirilgan. Uning ma’lumotiga ko‘ra, zarbalar Kaspiy dengizi akvatoriyasidan turib Tu-95 rusumli bombardimonchilar orqali yo‘llangan.

Bunday yoppasiga hujum so‘nggi bor 9 mart kuni kuzatilgandi. O‘tgan oy boshida Ukraina shaharlari Bryansk oblastidagi diversiyaga javoban o‘qqa tutilgandi. O‘shanda Zalujniy rossiyalik harbiylar quruqlik, dengiz va havodan jami 81 raketa uchirgani haqida ma’lum qilgandi.

{Yii::t(}

O'tkazib yuborish 6s

O'tkazib yuborish

Cherkass oblastidagi Uman shahrida raketa to‘qqiz qavatli uyga kelib urilgan. Natijada, rasmiylarning so‘nggi ma’lumotlariga ko‘ra, 21 kishi halok bo‘lgan, shundan uch nafari bolalar, 18 kishi yaralangan. Ichki ishlar vaziri Igor Klimenkoning ma’lum qilishicha, qutqaruv amaliyoti kamida bir kun davom etadi. Klimenkoning ma’lumotiga ko‘ra, yaqin atrofda joylashgan yana o‘nta ko‘p kvartirali uylar, shuningdek, 30 ga yaqin avtomobillar shikastlangan. Shaharda uch kunlik motam e’lon qilingan, barcha ko‘ngilochar tadbirlar noma’lum muddatga qoldirilgan.

Go‘dakning o‘limi haqidagi ma’lumotni Ukraina prezidenti ofisi maslahatchisi Darya Zarivna ham tasdiqlagan. «U 3-4 yoshlarda bo‘lgan. Hech kimga hech qanday yomonlik qilmagan go‘dak. Men buni aqlimga sig‘dira olmayapman», deya yozgan u o‘z telegram-kanalida.

Dniproda xususiy turar joylardan biri vayron bo‘lgan. Natijada, region rahbari Sergey Lisakning ma’lum qilishicha, 31 yoshli ayol va uning ikki yoshli qizi halok bo‘lgan, yana uch kishi tan jarohatlari olgan, ulardan ikki nafari shifoxonaga yotqizilgan. Xususiy korxona binosi va qurilish bazasida yong‘in chiqqan, 70 yoshli ayol jabrlangan. Lisakning tasdiqlashicha, oblast hududida yana yettita raketa urib tushirilgan.

Kiyev ustida 11 ta qanotli raketa, shuningdek ikkita dron urib tushirilgan, deb ma’lum qildi Kiyev shahar harbiy ma’muriyatidagilar. Shaharda jarohat olganlar yo‘q; Obolon rayonida raketa parchalari elektr uzatish liniyasini shikastlagan. Kiyev oblastining Ukrainka shahrida parchalar ko‘p kvartirali uy ustiga tushgan, 13 yoshli qiz yaralangan, uni shifoxonaga olib borishgan.

Ukraina prezidenti Volodimir Zelenskiy mamlakat «hech bir jinoyatni unutmasligi»ni ma’lum qildi. «Bu tunda dushman yana Ukrainaga raketalar va uchuvchisiz uchish qurilmalari bilan hujum qildi. Terrorchilar nishoni - tinch aholi va obektlar. Umanga raketa zarbalari oqibatida 10 ga yaqin ko‘p kvartirali uylar shikastlandi. Ulardan birida pod’yezd to‘lig‘icha vayron bo‘lgan. Xarobalar ostida odamlar qolmoqda. Afsuski, jabrlanganlar va qurbonlar bor, jumladan yosh bolalar. Dniproda terrorchilar go‘dakning umriga zomin bo‘lishdi. Rossiya terrori tufayli o‘z yaqinlarini yo‘qotgan barchaga hamdardlik bildiraman. Rossiya terrori Ukraina va dunyodan adolatli javobni olishi kerak. Va oladi ham. Bunday har bir huju, bizning mamlakatimiz va odamlarimizga qarshi har bir yovuzlik terrorchi davlatni muvaffaqiyatsizlik va jazoga yaqinlashtiradi, ular o‘ylayotganidek buning aksiga emas», — degan Zelenskiy va Ukraina «biror bosqinchiga javobgarlikdan qochib qutulishga imkon bermasligi»ni qo‘shimcha qilgan.

RF mudofaa vazirligi har kungi svodkasida «uzoq masofaga aniq boruvchi qurollar bilan yo‘naltirilgan zarbalar berilgani»ni tasdiqlagan. Vazirlik ma’lumotiga ko‘ra, hujumlar «raqibning zaxira kuchlari dislokatsiya punktlari bo‘ylab» berilgan. «Zarbadan maqsadga erishildi. Barcha belgilangan obektlar aniq nishonga olindi. Ukraina qurolli kuchlari dengiz piyodalari bo‘linmalari harbiy harakatlar hududiga harakatlanishiga yo‘l qo‘yilmadi», — deyiladi Mudofaa vazirligi bayonotida. Zarbalardan bir necha soat o‘tib RF mudofaa vazirligi telegram-kanalida «Tochno v tsel» yozuvi va «GeroiZ» heshtegi aks etgan kartinka paydo bo‘lgandi.