Украинада икки россиялик полковник ҳалок бўлди — РФ мудофаа вазирлиги

РФ мудофаа вазирлиги 4-мотоўқчи бригада қўмондони, полковник Вячеслав Макаров ҳамда армия корпуси қўмондонининг ҳарбий-сиёсий ишлар бўйича ўринбосари, полковник Евгений Бровко Украина қуролли кучларининг Соледар-Бахмут йўналишидаги ҳужумларини қайтариш чоғида ҳалок бўлгани ҳақида хабар берди.

Вазирлик хабарида айтилишича, Вячеслав Макаров Донецк областининг Бахмут шаҳри атрофидаги Красное қишлоғи ҳудудидаги жангларга бошчилик қилган ва оғир тан жароҳати олиб, жанг майдонидан эвакуация қилиш чоғида жон берган.

Полковник Евгений Бровко эса «бошқа участкада рақиб ҳужумини қайтариш» бўйича жангларга раҳбарлик қилган (айнан қаердалигига аниқлик киритилмаган). Бровко «снаряд парчаларидан кўп сонли жароҳатлар олиб қаҳрамонларча ҳалок бўлгани» қайд этилган.

РФ мудофаа вазирлиги Украина қуролли кучлари Бахмутдан шимолда ва жанубда Россия кучларининг «мудофаасини ёриб ўтиш учун ёппасига ҳаракат қилгани»ни қайд этган. «Украина қуролли кучлари бўлинмаларининг барча уринишлари қайтарилди. Россия қўшинларининг мудофааси ёриб ўтилишига йўл қўйилмади», — дейилган вазирлик хабарида.

• РФ мудофаа вазирлиги ўз ҳарбийларининг, айниқса юқори лавозимли қўмондонларининг ҳалокати ҳақида жуда камдан кам ҳолларда хабар беради. Одатда бундай ҳарбийлар ўлими ҳақида вазирлик уларни ўлимидан кейин мукофотлашга тақдим этганида маълум бўларди.
• BBC рус хизмати журналистлари «Медиазона» ва кўнгиллилар билан ҳамкорликда юритадиган лойиҳа ҳисоб-китобларига кўра, Россиянинг Украинага кенг кўламли босқини бошланганидан буён 22,6 мингдан ортиқ россиялик ҳарбий ўлими тасдиқланган. 12 май ҳолатига кўра, очиқ манбалар орқали урушда россиялик 57 полковник ва камида тўрт нафар генерал ҳалок бўлгани маълум бўлган.