Киев ўққа тутилиши оқибатлари ва Бахмутдаги ярадор аскарлар. Уруш суратлари

Украинадаги урушнинг 447-куни ўтди. Асосий маълумотлар:

16 майга ўтар кечаси Россия қўшини Киевга ракеталар ва дронлар билан ҳужум қилди. Украина қуролли кучлари россияликларнинг олтита «Кинжал» гипертовушли ракетаси уриб туширилганини маълум қилди. Сергей Шойгу эса Россия бунча «Кинжал» учирмаганини айтди.
Ўз навбатида РФ мудофаа вазирлиги «Кинжал» ракеталаридан бири Киевга жойлаштирилган Patriot комплексини йўқ қилгани ҳақида хабар берди. Украинага бу тизимларни етказиб берган Америка томони маълумотига кўра, комплекс, катта эҳтимол билан шикастланган, аммо буткул ишдан чиқарилмаган.
Буюк Британия ва Нидерландия Украинани F-16 қирувчилари билан таъминлаш учун халқаро коалиция тузишга келишиб олди. Шу вақтгача ғарблик ҳамкорлар Украинага замонавий қирувчи самолётлар етказиб беришдан бош тортиб келмоқда.
Франция президенти Эммануэл Макроннинг маълум қилишича, Исландияда бўлиб ўтган саммитда Европа Кенгашининг 46 аъзо мамлакати Россия томонидан Украинадаги уруш давомида етказилган ҳарбий йўқотишлар ва вайронгарчиликларни рўйхатга олиш учун «зарар реестри» ташкил этиш бўйича қарор қабул қилди.
Венгрия Европа тинчлик жамғармасидан Украинага ҳарбий ёрдамнинг навбатдаги траншини ажратишни маъқулламади, бу маълумотни Венгрия ҳукумати матбуот хизмати Reuters агентлигига йўлланган электрон мактубда тасдиқлаган. Аввалроқ Будапешт жамғармадан туган пуллар фақат Украина учун қурол сотиб олишга йўналтирилмаслиги учун кафолат талаб қилаётгани хабар қилинганди.

Киевнинг тунги ўққа тутилиши

РФ мудофаа вазирлиги 16 майга ўтар кечаси Россия қўшини «Кинжал» гипертовушли ракета комплекси орқали Американинг Украина қуролли кучларига берилган ва Киевга жойлаштирилган Patriot зенит ракета комплекси йўқ қилингани ҳақида маълум қилди. Украина томони бу баёнотни тасдиқламади: Украина қуролли кучлари ва Киев мэрияси РФ армияси томонидан учирилган барча дрон ва ракеталар — жумладан, олтита «Кинжал» — уриб туширилгани ҳақида хабар берди.

Киевдаги кузатув камерасига муҳрланган видео орқали россиялик ҳарбийлар шаҳар бўйлаб 30 га ракеталар йўллаганини кўриш мумкин. Видеоёзувларда украин ҳаво ҳужумидан мудофаа тизими ҳужумларни қайтаргани, шу билан бирга иккита ракета ерга қулагани акс этган. Бир неча дақиқа ўтиб зенит ракеталар учирилган жойда кучли портлаш рўй беради, яна бир дақиқа ўтиб — тутун устуни пайдо бўлади.