Африкада Россия қўшинлари олиб чиқилгунга қадар Украина бўйича музокара ўтказиш таклиф қилинди

Африканинг олти давлати етакчилари Украина Россия билан тинчлик музокараларини ҳатто ўз ҳудудида РФ қўшинлари бўлган тақдирда ҳам бошлаши керак, деб ҳисоблайди. Бундай фикрни Жанубий Африка Республикаси президенти Сирил Рамафоса 22 май, душанба куни ўз мамлакати делегациясининг Москва ва Киевга сафари арафасида билдирди, деб ёзади Reuters.

“Аввал – жанговар ҳаракатларни тўхтатиш, кейин – мустаҳкам тинчлик учун асосли шарт-шароитлар яратиш”, — дея агентлик ЖАР президенти вакили Винсент Магвенюнинг сўзларидан иқтибос келтиради.

Киевнинг позицияси шундан иборатки, Россия ҳарбийлари Украина ҳудудида экан, Москва билан тинчлик музокараларини бошлаш мумкин эмас. Айни пайтда Кремл 2014 йилда аннексия қилинган Қрим яримороли устидан Россия суверенитетини тан олишни талаб қилмоқда, деб эслатади Reuters.

Сирил Рамафоса 16 май куни Африка давлатларининг Украинадаги вазиятни тинч йўл билан тартибга солиш ташаббусини эълон қилди. Уни Сенегал президенти Маки Салл бошқаради. Ташаббусни Миср ва Замбия президентлари Абдул-Фаттоҳ Ас-Сисий ҳамда Хакаинде Хичилема, шунингдек, Конго Республикаси ва Уганда раҳбарлари Дени Сассу-Нгессо ҳамда Йовери Мусевени қўллаб-қувватламоқда.

2023 йил феврал ойида БМТ Бош ассамблеясида Сенегал делегацияси Украинада тинчликка эришиш, мамлакат суверенитети ва унинг халқаро тан олинган чегаралари доирасида ҳудудий яхлитлигига содиқлигини тасдиқлаш, Россия қўшинларини Украинанинг барча ҳудудидан зудлик билан олиб чиқиш зарурлиги тўғрисидаги резолюция бўйича овоз беришда иштирок этмади. Миср ва Замбия ушбу резолюцияни қўллаб-қувватлади, Конго Республикаси ва Уганда бетараф қолди.