Шолц Украина армиясининг жанговар қобилиятини оширишга чақирди

Германия канцлери Олаф Шолц яна Украинага чексиз ёрдамни ваъда қилди. «Германия Украинани қанча вақт керак бўлса, шунча қўллаб-қувватлайди. Биз Украина томонидамиз», - деди у 22 июнь, пайшанба куни Германия Бундестагида ҳукумат баёнотида. 

НАТОнинг июль ойида Вилнюсда бўлиб ўтадиган саммити арафасида Шолц Украина учун кенг кўламли хавфсизлик кафолатларини беришга чақирди. «Мутлақ устувор вазифа - Украинанинг жанговар қобилиятини ошириш. НАТО Европа Иттифоқи ва G7 давлатлари билан параллел равишда самарали ва узоқ муддатли хавфсизлик кафолатларини ишлаб чиқишда ҳамкорлик қилмоқда», - деди у. 

Шолц Германия аллақачон Украинага 16,8 миллиард евро миқдорида фуқаролик ва ҳарбий ёрдам кўрсатганини эслатди. У Берлин Киевни зирҳли техника, ҳаво ҳужумидан мудофаа тизимлари, артиллерия ва ўқ-дорилар билан таъминлашда давом этишига ваъда берди – айнан шу нарса Украинага, унинг сўзларига кўра, ҳудудларни озод қилиш учун ҳозирги қарши ҳужумида энг зарур. 

Канцлернинг сўзларига кўра, иттифоқчиларнинг иккита мақсади бор – Украинага доимий равишда ҳарбий ёрдам, жумладан, замонавий Ғарб қуроллари билан таъминлаш ва шу билан бирга, Украинанинг иқтисодий чидамлилигини кучайтириш. «Бизнинг яқиндан мувофиқлаштирилган амалий ва аниқ ёрдамимиз Украина учун ҳал қилувчи ва ҳаётий аҳамиятга эга бўлиб қолмоқда», - деди у. 

Шу билан бирга, Шолц уруш тугагунига қадар Украинанинг НАТОга кириши ҳақида гап бўлиши мумкин эмаслигини таъкидлади. «Украинанинг ўзи НАТОга қўшилиш истаги бўйича ҳозир ҳеч қандай имконият йўқлигини тушунади. Украина ҳукуматининг ўзи тушуниб етдики, Украинада уруш давом этаётган экан, НАТОга қўшилиш ҳақида гап бўлиши мумкин эмас», - деди у. 

Олаф Шолц ҳукумат баёнотида Германия ҳукуматининг Германия ва Европани ҳимоя қилишдаги қатъиятини таъкидлади. «Биз мамлакатимиз хавфсизлигини ҳар қандай таҳдиддан ҳимоя қилиш учун зарур бўлган барча ишни қиляпмиз», — деди у ҳамда Германия НАТО доирасида Шимолий Атлантика иттифоқи Шарқий Европа мамлакатлари хавфсизлигига алоҳида ғамхўрлик қилиш ниятида эканини қўшимча қилди. Шолц, шунингдек, умумевропа ҳаво ҳужумидан мудофаа тизимини яратиш бўйича режалаштирилган ишлардан мамнунлигини билдирди. 

«Европада хавфсизлик билан боғлиқ вазиятнинг тубдан ўзгариши» фактини таъкидлаб, Шолц мамлакат қуролли кучлари - Бундесверни оммавий ва тинимсиз мустаҳкамлашга ваъда берди. У 2024 йилдан бошлаб Германия ялпи ички маҳсулотининг камида икки фоизини мудофаа соҳасига ажратиш бўйича НАТО мандатига риоя қилишга ваъда берди. 

«Ҳукумат Бундесвер ниҳоят зарур жиҳозларни олишини таъминлаш учун ҳаракат қилмоқда», - дея таъкидлади Шолц. Унга кўра, бунга Украинада уруш бошланганидан сўнг кўп ўтмай ташкил этилган қурол-яроғ сотиб олиш учун 100 миллиард евролик махсус жамғарма ёрдам бермоқда.