Канцлер Шолц: Германия Франциядаги тартибсизликлардан хавотирда

Германия 17 ёшли ўсмирнинг полициячи томонидан ўлдирилиши ортидан бир қатор шаҳарларда беш кундан бери тартибсизликлар тинмаётган Франциядаги воқеаларни хавотир билан кузатиб бормоқда. Бу ҳақда Германия канцлери Олаф Шолц 2 июл, якшанба куни ARD оммавий юридик медиа-компаниясига интервюсида гапирди.

Берлин Францияни “дўстона қўшни давлат” сифатида кўради, деди Германия ҳукумати раҳбари. У Франция Республикасига беқарорлик таҳдид солмаслигига ва унинг президенти Эммануэл Макрон “вазиятнинг тез яхшиланишини таъминлаш йўлларини топишига” ишонч билдирди. Бир кун аввал Франция давлати раҳбари Германияга 2-4 июл кунларига мўлжалланган давлат ташрифини қолдирган эди.

Шу билан бирга, Шолц Германияда ҳам тартибсизликлар бошланиши мумкинлигига ишонмайди. "Бунинг белгилари йўқ", деб таъкидлади Германия вазирлар маҳкамаси раҳбари. Берлин энергиянинг юқори нархларини юмшатиш ва энергия таъминоти ишончлилигини таъминлаш бўйича кўп ишларни амалга оширди, дея қўшимча қилди канцлер аҳолининг мамлакат энергетика сиёсатидан норозилигига ишора қилиб.

Париж яқинидаги норозилик намойишлари 28 июнга ўтар кечаси Нантерда ўсмирнинг полициячи томонидан ўлдирилиши ортидан бошланди. Автомобилни бошқараётган ўсмир йўл-патрул хизмати ходимларининг талабига кўра тўхташдан бош тортган ва отиб ўлдирилган. Воқеа жойига етиб келган шифокорлар йигитни сақлаб қола олмади.