Chevrolet Traverse 2024 ва қоғоз каби ўраладиган янги iPhone – ҳафта технодайжести

Telegram’да stories’лар

Telegram мессенжерида stories – ҳикоялар функцияси пайдо бўлди. Ҳозирча фақат Premium обунасига эга фойдаланувчилар stories’ларни жойлаштириши ва ижтимоий тармоқлардаги каби таҳрирлаши мумкин.

Ҳикояларнинг махфийлиги сақланади: сиз сторисни ким кўришини ўзингиз ҳал қиласиз, бошқаларнинг сторисларини ҳам яшириб қўйишингиз мумкин.

Шунингдек, сторисда машҳур ижтимоий тармоқлар каби фото ва видеоларни таҳрирлаш, улар устига ёзиш ва бошқаларни белгилаш имкони бўлади. Камерадан фойдаланишда эса Telegram видеохабарлари каби иккита камерани қўллаб-қувватлаш хизмати бўлади.

Ҳикоянинг профилда қолиш муддатини ҳам фойдаланувчининг ўзи белгилайди: ҳикоя 6, 12, 24 ёки 48 соатда тугашини ёки доимий равишда қолишини танлаш мумкин.

INMO Air2 ақлли кўзойнаги

ChatGPT функцияларига эга ақлли INMO Air2 кўзойнаклари тақдим қилинди. Қурилма тўрт ядроли ZiGuang ZhanRui процессори асосида ишлайди, оператив хотираси – 2 Гб. Кўзойнак дисплейи ёрдамида суҳбатдош нутқини реал вақт режимида таржима қилиш, видео кўриш ва уни ёзиб олиш мумкин. Шунингдек, сунъий интеллектдан фойдалана олиш имкониятларига катта урғу берилган. Хусусан, AI’га исталган саволни бериш мумкин, жавоблар эса кўзойнакда акс этади.

 INMO Air2 бир қувватланишда 55 соатгача ишлаши мумкин. Ақлли кўзойнакка олдиндан буюртма бериш мумкин, баҳоси – 599 доллар.

Chevrolet Traverse 2024

Chevrolet Traverseʼнинг учинчи авлоди тақдим этилди. Катта кроссоверда уч қатор ўриндиқлар сақлаб қолинган, ташқи кўриниш катта ўзгаришга учраган, двигател ҳам янгиланган.

Харидорларга автомобил 7 ёки 8 ўриндиқли вариантда тақдим этилади. У уч ҳудудли иқлим назорати, 360 даражали камера, адаптив круиз назорати билан таъминланган. Аудиотизимга эса Bose жавоб беради. Рул ва дастлабки икки қатор ўриндиқлари совуқ кунларда иситиш функциясига эга. Шунингдек, парковка қилиш ёрдам берадиган, орқадаги йўловчидан огоҳлантирувчи функциялар ҳам мавжуд.

Икки экран ўрнатилган: 11 дюймли ва 17,7 дюймли. Иқлим назоратини сенсор панел орқали бошқариш мумкин.

Эски моделда 3,6 литрлик V6 двигатели ўрнатилганди. Янгиланган модел 2,5 литр ҳажмли 319 от кучини берадиган турбомотор билан жиҳозланган. У эса 8 поғонали автомат узатмалар қутиси билан биргаликда ишлайди. 

Радиатор панжараси, томдаги рейлинглар, шунингдек, молдинглар қора рангда. 22 дюймли ғилдираклар ҳам шунга монанд дизайнда ишланган. 

Сhevrolet Traverse'нинг 3-авлодини ишлаб чиқариш General Motors’нинг Мичигандаги заводида йўлга қўйилади. Моделнинг АҚШдаги илк савдолари 2024 йилнинг биринчи чорагида бошланиши кутилмоқда.

Маълумот учун, Traverse'нинг 2-авлоди Ўзбекистонда расман 737 730 560 (63,5 минг доллар) сўмдан сотувга қўйилган.

Испанияда учар такси

Германиянинг Lilium компанияси Испания жанубида вертикал тарзда парвоз қилувчи учар таксини синовдан ўтказди. Қурилмада бир вақтнинг ўзида олти нафар йўловчи ва учувчи жойлашиши мумкин.

Умуман олганда, ривожланган давлатлардаги тирбанд шаҳарларда йўловчиларни ташиш, юк ташиш, тез ёрдам машиналари учун учар машиналардан фойдаланиш устида ишлашмоқда. Хусусан, Volocopter, Lilium, Joby Aviation ва Airbus каби компаниялар бу борада жиддий ишламоқда.

Қоғоз каби ўраладиган янги iPhone

Американинг Apple компанияси iPhone смартфонини худди қоғоз каби ўраш имконини берувчи технологияни патентлади. Тегишли патент АҚШ профиль бюроси сайтида эълон қилинди. 

Ҳужжатдаги маълумотларга кўра, патентга ариза Apple томонидан 2022 йил ноябрида топширилган. Чизмаларда смартфоннинг ўраладиган электрон дисплейи кўрсатилган. У ўралган экранни ҳимоя қиладиган юпқа шиша ва компонентларга эга. 

«Дисплей ҳолатини ўзгартириши мумкин: у ёйилган ҳолда ишлатилади, ташиш ва қулай сақлаш учун ўралади. Шунингдек, экранни қисман ўралган ҳолда ҳам ишлатса бўлади», дейилади ҳужжатда. 

Шунингдек, патент анъанавий электрон дисплейлар учун эканлиги таъкидланган. Бироқ Apple аризада дизайнни смартфонлар учун ишлатиш мумкинлигини алоҳида қайд этган. 

Манбада таъкидланганидек, Apple ушбу технологиядан iPhone смартфонларини ишлаб чиқаришда фойдаланмоқчи. Миш-мишларга кўра, Samsung ва Motorola каби компаниялар ҳам бу борада ишламоқда. 

Ўзбекистонда Хитойнинг JAC автомобиллари ишлаб чиқарилиши мумкин

Қарши шаҳрида Хитойнинг JAC автомобиллари ишлаб чиқарилиши мумкин. Қашқадарё вилояти ҳокими Мурод Азимов бошчилигидаги делегация Хитойга ташрифининг иккинчи куни JAC Mators компанияси фаолияти билан танишиб, ушбу компания ишлаб чиқараётган анъанавий ёки электромобилларни Қарши шаҳрида ҳам ишлаб чиқаришни йўлга қўйиш борасида музокаралар олиб борди.

Қайд этилишича, JAC Хитой автомобил ишлаб чиқарувчилари орасида ўзига хос нуфузга эга. Компания автомобиллари жаҳоннинг 60дан ортиқ давлатларида экспорт қилинмоқда. Делегация компания раҳбарияти билан икки томонлама учрашувда мазкур инвестиция лойиҳаси келгусида вилоятнинг ташриф қоғози бўлишини таъкидлади. Компания раҳбарияти тез орада Қарши шаҳрига келиши кутилмоқда.