Сирдарё вилоят ҳокимига янги ўринбосар тайинланди

Вилоят ҳокимининг ёшлар масалалари бўйича олдинги ўринбосари Шавкат Зайниддинов президентнинг Фарғона вилоятига ташрифи чоғида ўтказилган видеоселектор давомида ишдан олинганди.

Фото: Сирдарё вилояти ҳокимлиги

Бекзод Бозарбоевич Исматов Сирдарё вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимига тайинланди.

Бекзод Исматов бугунга қадар вилоят маданият ва туризм бошқармаси бошлиғи вазифасида фаолият юритиб келаётган эди.

Сирдарё вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича собиқ ўринбосари Шавкат Зайниддинов бу лавозимда 2022 йил сентябридан буён ишлаб келаётганди. У 2023 йил 27 июл куни президентнинг Фарғона вилоятига ташрифи чоғида ўтказилган видеоселектор давомида ишдан олинганди.