«ПСЖ»га рад жавоби берилди, Испанияда яна бир россиялик. Сўнгги трансфер хабарлари

Трансферлар дайжестида сўнгги кунларда амалга ошган ўтишлар, жаҳон чемпионининг кутилмаган қарори ва «ПСЖ»нинг сахий таклифи ҳақида.

«Галатасарой» «Челси»дан Зиёшни ижарага олди

Зиёш бу трансферлар ойнасида ҳам ноқулай вазиятга тушиб қолди. Бироз аввалроқ ушбу марокашлик футболчи Саудия Арабистонига ўтиши кутилаётганди, аммо тиббий кўрик натижалари муваффақиятсиз чиқди. «Ан-Наср» шифокорлари футболчининг тиззасида муаммо борлигини аниқлашди. Қишки трансферлар ойнаси вақтида ҳам унинг «ПСЖ»га ўтиши сўнгги дақиқаларда барбод бўлганди - бунга ҳужжатлардаги камчилик сабаб сифатида келтирилганди. Манбаларга кўра, дастлаб «ПСЖ»га Лондондан хато ҳужжат келган. Шундан кейин кўклар жамоаси ҳуқуқшунослари хатони тузатишган ва шартномани қайтадан юборишган, аммо унда зарур имзолар бўлмаган. «Челси» хатони тўғрилаб юборганида эса трансферлар ойнаси ёпилиб қолган. Инглизлар клуби хатолар сериясини асосий эътибор «Бенфика»дан аргентиналик яримҳимоячи Энцо Фернандесни сотиб олишга қаратилгани билан боғлаганди.

Туркияда эса Зиёш ҳеч қандай муаммога учрамади. Тиббий кўрикдан ўтди ва шартномага имзо чекди. Келишувга кўра, «Галатасарой» марокашлик футболчини мавсум охирига қадар ижарага олган. Шу билан бирга, туркларда уни мавсум якунида сотиб олиш ҳуқуқи ҳам бўлади.

Марокашлик футболчи янги мавсумда йилига 3,6 млн евро маош олади. Агар у 2024 йил ёзида турк клуби билан шартнома имзоласа, маош миқдори бироз пасаяди — 2,8 млн евро.

«Ал-Ҳилол» яна бир катта трансферни амалга оширди

Бу сафарги дайжест ҳам Саудия Арабистони иштирокисиз ўтмайди. Ёзда «Ал-Ҳилол» таркибни кучайтириш учун бемисл даражада маблағ сарфламоқда: жамоага Малком, Неймар, Сергей Милинкович-Савич, Рубен Невеш, Калиду Кулибали ва Яссин Буну келишди. Энди бу компанияга яна бир серб — ҳужумчи Александр Митрович қўшилди. Романо бу трансфер саудияликлар клубига камида 50 млн еврога тушганини ёзган.

«Фулҳэм» ҳам трансферни тасдиқлаган, аммо бу таклифни истар-истамай қабул қилганига, Митровичнинг ўзи мунтазам равишда кетиш истагини билдириб турганига урғу қаратилган.

Уни тушуниш мумкин, 28 ёшли футболчига Саудия Арабистони йилига 25 млн евро миқдорида маош тўланади.

Митрович ўтган мавсумда АПЛнинг 24 ўйинида 14 гол урди, шунингдек Қатардаги жаҳон чемпионатида иштирок этди.

Малиновский Италияга қайтди

Украиналик яримҳимоячи Руслан Малиновский ўтган мавсумни «Аталанта» сафида бошлаган, қишда эса «Марсел»га кетганди. Француз клуби уни кейинроқ сотиб олиш ҳуқуқи билан ижарага олганди. Мавсум якунида «Марсел» ушбу опцияни ишга туширди ва 10 млн евро эвазига футболчини ўзиники қилди. Украиналик футболчи провансалликлар сафида ўтган мавсумнинг иккинчи қисмида жами 23 ўйинда майдонга тушиб, икки гол урган ва бир голга ҳаммуаллифлик қилганди. Энди Малиновскийни Италияда фаолиятининг янги босқичи кутмоқда. Ўтган мавсум якунларига кўра А Серияга қайтган «Женоа» 30 ёшли футболчини мавсум охирида сотиб олиш ҳуқуқи билан ижарага олди. Русланга жаҳон чемпиони устозлик қилади — Алберто Жилардино 2006 йилда бу титулни қўлга киритганди.

Захарян расман «Реал Соседад»га ўтди

Москванинг «Динамо» клуби собиқ яримҳимоячиси Арсен Захарян расман «Реал Соседад» футболчисига айланди. Испанлар клуби ушбу 20 ёшли футболчи трансфери ҳақида расман эълон қилди.

Захарян ва «Реал Соседад» ўртасидаги шартнома 2029 йил ёзига қадар мўлжалланган. ОАВ маълумотига кўра, басклар клуби футболчи учун москваликлар клубига 13 миллион евро тўлаган, бонуслар ҳам кўзда тутилган.

Россиялик футболчи Испания клубида 12-рақамли футболкада тўп тепади.

«Реал Соседад»да аввал ҳам россиялик футболчи ўйнаган, ҳозирда «Ростов» клуби ва Россия миллий жамоаси бош мураббийи ҳисобланган Валерий Карпин 1994-1996 ва 2002-2005 йилларда «Реал Соседад» клуби аъзоси бўлган.

«Барселона» Дестни яна ижарага бериб юборди

2020 йилда «Барселона» Сержино Дест учун «Аякс»га 21 млн евро тўлаганди. Ўтган вақт ичида америкалик ҳимоячи каталонлар клуби либосида жами 72 ўйинда майдонга тушди, аммо жамоада муқим ўрнаша олмади. Ўтган мавсумда Дест «Милан»га ижарага берилганди (у Италия чемпионатида 14 ўйин ўтказди), энди эса 22 ёшли футболчи Нидерландияга қайтди. Аммо «Аякс»га эмас, мамлакатнинг бошқа бир топ-клуби — ПСВ сафига. Эйндҳовен клуби уни мавсум якунида 10 млн еврога сотиб олиш ҳуқуқи билан ижарага олган. Дарвоқе, ПСВ, «Аякс»дан фарқли ўлароқ, Чемпионлар лигасида ўйнайди, ҳозирча саралаш босқичида иштирок этади.

Ҳаби Алонсо «Бавария» ҳимоячисига эга бўлди

Станишич 2017 йилдан буён «Бавария» тизимида эди. Олти йил ўтиб вазиятни ўзгартиришга қарор қилди. Клуб уни ижарага берган, энди хорватиялик ҳимоячи олдиндаги мавсумни Ҳаби Алонсо бошқарувидаги «Байер»да ўтказади. 23 ёшда бўлган Йосип шу вақтгача «Бавария»нинг асосий жамоасида 41-ўйинда майдонга тушган (шундан 23 ўйин — ўтган мавсумга тўғри келади). Трансфердан кейин «Байер» спорт директори Симон Ролфес ушбу футболчи икки оёқда ҳам бирдек ўйнай олиши ва ҳимояда бир неча позицияни ёпиши мумкинлигини эътироф этди.

«Аякс» ЖЧ-2022 совриндорини сафга қўшиб олди

Хорватиянинг уч карра чемпиони фаолиятида илк бор хорижда тўп суради. 23 ёшли ҳимоячи Йосип Шутало «Аякс» таклифини қабул қилди, Загребнинг «Динамо» клуби эса 20,5 млн евро олади. Бу барча томонларни қониқтирувчи келишув бўлди. Бу мавсумда Шутало барча турнирлар доирасида етти ўйинда майдонга тушишга улгурди ва бир гол урди. Унинг трансфери хорватлар клуби Чемпионлар лигаси саралаш босқичини тарк этганидан кейин эълон қилинди. «Аякс» ҳам бу мавсумда Европанинг энг нуфузли турнирида қатнашмайди. Амстердамликлар ўтган мавсум якунларига кўра йўлланмага эга бўла олмаган. Ўтган йил охирида Шутало Қатардаги жаҳон чемпионатида бронза медал совриндори бўлганди, у мундиалда миллий жамоанинг фақат ўйинида қатнашган.

«Ланс» катта пулга ҳужумчи олди

«Ланс» маркази ҳужумчи учун яхшигина маблағ (35 млн евро) сарфлади. 20 ёшли Эле Ваи узоқ муддатли шартнома тузди — 2028 йилгача. Ушбу йигитча ўтган мавсумда «Монпеле» сафида ажойиб статистика қайд этганди — Франция чемпионатининг 33 ўйинида 19 гол. Бу орқали у АПЛ ва Бундеслига клублари, жумладан «Челси», «Вест Ҳэм» ва «Айнтрахт» назарига тушганди.

«Ланс» тез орада Чемпионлар лигаси гуруҳ босқичидаги ўйинларини бошлайди ва жамоа янги футболчилар учун аллақачон 60 млн евро сарфлаб бўлди. Шу билан бирга тўпурари Луа Опендани йўқотди, у «РБ Лейпциг» сафига бориб қўшилган. Афтидан, Ваи айнан ушбу форвард ўрнини тўлдириш учун олиб келинди.

АҚШ миллий жамоаси аъзоси АПЛга қайтди

Америкалик яримҳимоячи Тайлер Адамс ўтган ҳафтада «Челси» футболчиси сифатида эълон қилиниши кутилганди. Айрим маълумотларга кўра, футболчи тўлиқ тиббий кўрикдан ҳам ўтганди, аммо Лондон клуби босслари фикрини ўзгартирди. Улар таянч зонаси учун Мойсес Кайседо ва Ромео Лавиани олиб келишга қарор қилишганди. Натижада Адамс бу мавсумда Чемпионшипда қатнашаётган «Лидс»га қайтиб кетди. Аммо у бу клубда кўп вақт ушланиб қолмади — бир неча кун ўтиб уни «Борнмут» сотиб олди. АПЛ иштирокчиси ушбу футболчи учун 26,9 млн евронинг баҳридан ўтган.

«ПСЖ» Коло Муани бўйича музокараларда муаммога дуч келди

«Айнтрахт» ҳужумчиси Рандал Коло Муани «ПСЖ» билан беш йиллик шартнома бўйича келишиб қўйганди. Ҳарҳолда матбуотда шундай ёзишаётганди, фақат «Айнтрахт» билан келишиш қолганди. Лекин шундан кейин олдинга силжиш бўлмай қолди. Парижликлар ЖЧ-2022 кумуш медали совриндори трансфери бўйича илк таклифни юборган — 65 млн евро. Аммо «Айнтрахт» дарҳол рад жавобини қайтарган.

Бу «ПСЖ»га келишув бўйича илк рад жавоби эмас. Масалан, Килиан Мбаппе бу ёзда шартномасини узайтиришга рози бўлмаяпти. Дарвоқе, Коло Муани бундеслиганинг 1-турида «Дармштадт»га қарши кечган ўйинда (1:0) майдонга чиқди ва ғалаба голини урди.

Лапорт «Манчестер Сити»ни Саудия Арабистонига алмашмоқда

«Манчестер Сити» сафида марказий ҳимоячилар сони етарлича. Энди уларнинг сони биттага камаймоқда. Эмерик Лапорт яқин вақтлар ичида «Ан-Наср» билан шартнома имзолаб, Криштиану Роналду ва Садио Манега жамоадош бўлади. Инсайдер Фабрицио Романога кўра, «Ман Сити» бу трансфердан тахминан 30 млн евро ишлаб олади, футболчи эса 2026 йилга қадар амал қилувчи шартномага эга бўлади. Лапорт шартнома бўйича ҳам келишиб қўйган, унга кўра йилига 20 млн евро олади. Трансфер расман тасдиқланиши кутилмоқда.

Жаҳон чемпиони АПЛ аутсайдери таркибини тўлдиради

Ўтган йил охирида «Севиля» ҳимоячиси Гонсало Монтиел жаҳон чемпиони бўлганди. Мавсум якунида аргентиналик футболчи клуби билан Европа Лигасида муваффақият қозонганди. Энди эса АПЛга келмоқда, аммо аутсайдер клуб сафига. Романонинг тасдиқлашича, «Ноттингҳем Форест» футболчини 12 млн еврога трансфер қилиш бўйича келишувга эришган. 21 август куни Монтиел тиббий кўрикдан ўтади, шундан кейин унинг таништирув маросимини ўтказиш режалаштирилган. «Ноттингҳем» ўтган мавсумда жуда кўп янги футболчиларни сафга қўшиб олган (30 нафарга яқин), аммо катта қийинчилик билан АПЛда қола олганди.

Озмунга «Милан» қизиқмоқда

«Милан» «Байер» форварди Сердар Озмунга қизиқиш билдирмоқда. Sky нашри инсайдери Флориан Плеттербергга кўра, италянлар клуби 28 ёшли эронликни сотиб олишга уриниб кўради ва футболчининг ўзи ҳам кучини Италияда синаб кўришга қарши эмас.

Қайд этилишича, клублар ўртасидаги музокаралар эндигина бошланган, ҳозирча бирор келишувга эришилмаган.

Аввалроқ «Зенит» эронлик форвардни қайтармоқчи экани ҳақида хабарлар чиққанди. У бу клуб сафида 2019 йилдан 2022 йилга қадар муваффақиятли тўп сурган. Кейинроқ унинг агенти Россия клуби билан музокара ўтказилмаётганини маълум қилди.

Ўтган мавсумда Озмун «Байер» сафида 33 ўйинда майдонга тушиб, «гол+пас» тизимида 8 (4+4) очко тўплади. 

«Порту» яримҳимоячисини «Ан-Наср»га сотади

«Порту» яримҳимоячиси Отавио ҳам Саудия Арабистонига йўл олади ва бу трансфердан 60 млн евро ишлаб олади. Шу билан бирга, «Алн-Наср» бу суммани битта эмас, бир неча транш орқали тўлайди. Томонлар ҳозирда ҳужжатларни кўриб чиқмоқда, шундан кейин футболчи Осиёга келади ва янги клуби учун тиббий кўрикдан ўтади. ОАВга кўра, 28 ёшли футболчининг йиллик маоши миқдори 15 млн еврони ташкил этади. Ўтган мавсумда Отавио португаллар клубининг 44-ўйинида майдонга тушиб, етти гол урган ва 13 голга узатма берган.