Европада трансферлар ойнасининг сўнгги кунлари. Дедлайнгача клубини ўзгартириши кутилаётган 10 юлдуз футболчи

Ромелу Лукаку, 30 ёш

• Қаердан: «Челси»
• Қаерга: «Рома»

Белгиялик форвард ҳамон «Челси» аъзоси эканига ишониш қийин, клуб унга анча вақтдан буён янги клуб қидирмоқда. «Интер» Чемпионлар лигаси финали антиқаҳрамонини яна ижарага олишни истамади, трансферлар ойнаси охирида эса Италия чемпионатидан бошқа бир талабгор пайдо бўлди.

Белгиялик футболчининг характери мураккаб, аммо Жозе Моуринио уни қандай ўйнатишни билади, португалиялик мураббий бунгача Лукаку билан икки бор ишлаган — «Челси» ва «Манчестер Юнайтед» клубларида. Ромелунинг ўзи фаолиятига импулс кераклигини тушуниб турибди ва ҳатто маоши камайишига ҳам рози. Вазият «Рома» учун ҳам қулай, чунки Лукакуни катта пулга харид қилмасдан, фақат бир йил муддатга ижарага олиш мумкин.

Бенжамен Павар, 27 ёш

• Қаердан: «Бавария»
• Қаерга: «Интер»

Россиядаги жаҳон чемпионатининг энг чиройли голи муаллифи ва ғолиби қитъанинг энг кучли ҳимоячиларидан бири бўлиб қолмоқда. «Бавария»да сўнгги вақтларда Павар ўсишдан тўхтаб қолди ва янги чақириққа эҳтиёж сезмоқда. «Интер»нинг қизиқишидан хабар топган француз футболчи мюнхенликлар жамоасининг бир неча машғулотларини ҳам ўтказиб юборди.

Павар учун бу трансфер ортга қадамдек кўриниши ҳам мумкин, чунки «Интер» «Бавария» каби исталган турнирда ғолибликка асосий фаворитлар қаторида кўриладиган жамоа эмас. Нерадзуррилар таркиби ҳам ҳозирда у қадар кучли кўринмайди. Аммо миланликлар бу трансфердан рози — Павар аллақачон Италияга учиб келган ва тиббий кўрикда ўтган, «Бавария» эса ҳимоячиси учун 30 миллион евро олади, яна 2 миллион евро миқдорида бонуслар тўлаб берилиши мумкин.

Райан Гравенберҳ, 21 ёш

• Қаердан: «Бавария»
• Қаерга: «Манчестер Юнайтед», «Ливерпул»

Гравенберҳ — «Аякс» академиясининг сўнгги йиллардаги энг истеъдодли тарбияланувчиларидан бири. Нидерландиялик футболчининг бир йил муқаддам «Бавария»га ўтиши фаолиятидаги мантиқий қадамдек кўринганди, аммо мавсум давомида Райан ротация футболчиси мақомидан чиқа олмади.

Гравенберҳ АПЛга кўчиб ўтиши ҳақида хабарлар баҳордаёқ пайдо бўла бошлаганди, аммо ушбу ҳавбек учун жиддий сўров бўлмаётганди. Ҳозирга келиб эса «Ливерпул» ва «Манчестер Юнайтед» фаоллашиб қолган: Юрген Клопп ўрта чизиқни тубдан қайта қуриш ишларини амалга оширмоқда, Эрик тен Ҳаг ҳам ҳали жамоасини охиригача қуриб бўлмади. «Бавария» музокаралар учун очиқ, шундай экан, трансферлар ойнасининг сўнгги кунида трансфер амалга ошиши эҳтимоли юқори, чунки томонларнинг барчаси бундан манфаатдор.

Скотт Мактоминей, 26 ёш

• Қаердан: «Манчестер Юнайтед»
• Қаерга: «Бавария»

«МЮ»нинг Гравенберҳ учун курашдаги кузирларидан бири — Скотт Мактоминей. Тен Ҳаг бошқаруви даврида ушбу шотландиялик яримҳимоячида ўйин амалиёти камайиб кетди, ҳатто Фред кетганидан кейин ҳам асосий таркибга кира олмаяпти. Мактоминей ҳали 26 ёшда, шундай экан, у нега фаолиятини бошқа топ-клубда қайтадан бошлашга уриниб кўрмаслиги керак? Қолаверса, «Бавария»га олдинроқ етиб борган инглиззабон Ҳарри Кейн билан зерикиб қолмайди.

Гравенберҳни Мактоминейга алмашиш барча томондан адекват вариант сифатида кўринади, чунки икки футболчига ҳам янги чақириқ керак, клублар эса яримҳимоя чизиғини янгилашни истайди. Катта эҳтимол билан, келишув ҳеч қандай қўшимча маблағсиз амалга ошади, «Бавария» ҳам, «Юнайтед» ҳам ўз футболчиларини бир хилда юқори баҳолайди.

Матеус Нунес, 25 ёш

• Қаердан: «Вулверҳэмптон»
• Қаерга: «Манчестер Сити»

Чемпионлар лигаси ғолиблари таркибида жиддий муаммолар йўқ. Ёзда «Манчестер Сити» кетган футболчилар ўрнини тўлдириш учун муайян чизиқлар бўйича трансферлар амалга оширди: Гундўған ўрнини Ковачич, Ляпорт ўрнини — Гвардиол, Маҳрез ўрнини — Доку эгаллади. Аммо мавсум стартида яна бир йўқотишга учралди: де Брюйне жароҳат туфайли йил охиригача сафдан чиқди, шунинг учун «Сити» вақтинча муқобил вариант излашга киришди.

«Шаҳарликлар» учун узоқ вақтгача «Вест Ҳэм»даги Лукас Пакета устувор вариант бўлиб турганди, аммо бразилиялик футболчининг атрофидагилар унинг иштирокидаги ўйинда у сариқ карточка олишига дов тикишгани маълум бўлгач, Англия чемпионлари бу танловдан воз кечди. Энди янги нишон — Португалия миллий жамоаси ҳавбеки Матеус Нунес, ушбу футболчи учун «Вулверҳэмптон»га 60 миллион евро таклиф қилинган. The Athletic маълумотига кўра, бу ҳақда хабар топган яримҳимоячи «бўрилар»нинг машғулотларини бойкот қилган ва ўзини ушбу клубга сотишни талаб қилмоқда.

Инсайдер Фабрицио Романога кўра, «шаҳарликлар» Матеус Нунес трансфери бўйича «Вулверҳэмптон» билан келишувга эришган. Келишув доирасида «Сити»нинг 21 ёшли яримҳимоячиси Томми Дойл «Вулверҳэмптон»га ўтиши кўзда тутилган.

Марк Кукуреля, 25 ёш

• Қаердан: «Челси»
• Қаерга: «Манчестер Юнайтед»

Қўшнилардан фарқли ўлароқ, «МЮ» чемпионлик курашига тайёр эмасдек кўринмоқда, аммо ҳозирда гап ҳатто бундай глобал мақсад ҳақида ҳам эмас: Люк Шоу ҳам, Тайрелл Маласия ҳам жароҳат олиб сафдан чиққан, натижада «МЮ» ҳимояси чап қанотида улкан тешик юзага келган.

«Юнайтед» Маркос Алонсо ва Серхио Регилон номзодларини ҳам кўриб чиққанди, аммо Марк Кукуреля номзодида тўхталди: «Челси»нинг жингалаксоч ҳимоячиси «Стэмфорд Бриж»да ўтган бир мавсум давомида ҳеч кимда таассурот қолдира олмади, Маурисио Почеттино эса янги мавсумда чап қанотда Бен Чилуэлл ва Иан Матсенни ўйнатишни афзал кўрмоқда. «МЮ» эса Кукуреляга фаолиятини қайта тиклаш имконини тақдим этади, лекин у дарҳол ҳаракатга киришиши керак, чунки вақт кўп эмас: «Юнайтед» Маркни бир мавсум учун ижарага олмоқда.

Жоау Феликс, 23 ёш

• Қаердан: «Атлетико»
• Қаерга: «Барселона»

Португалиялик форвард билан боғлиқ ҳолат ўзига хос. Амалдаги топ-футболчи рақобатчи клуб сафига ўтишни исташи ҳақида очиқ баёнот бериши камдан кам кузатилади. Аммо шундай бўлди. Июл ойида Жоау Феликс  Фабрицио Романо орқали шундай деганди: «Мен «Барселона»га ўтишни истардим. У ҳамиша мен учун биринчи танлов бўлган. Мен бу клубда ўйнашни болаликдан орзу қиламан».

Албатта, «Атлетико» фанатлари ва раҳбарияти Феликснинг бу чиқишидан ғазаб отига минишди, шунинг учун у жамоада қолишини исташмаяпти. «Атлетико» президенти Энрике Сересо ҳужумчи Мадрид клубида ўйнамоқчи эмаслигини айтиб чиқди. Феликс бош мураббий билан ҳам келишмовчиликка боргани ҳақида хабарлар бор. Янгиликларда «Астон Вилла», «Нюкасл», «Бенфика», «ПСЖ» ва форварднинг агенти Жорже Мендешнинг таъсири кучли бўлган «Вулверҳэмптон» клубларининг қизиқишлари ҳақида гап борди. Сўнгги вақтларда эса «Барселона» асосий вариантга айланди.

Аммо ҳали келишувга эришилгани йўқ: «Барселона» молиявий сабабларга кўра ҳозирча Феликсни рўйхатдан ўтказа олмайди, трансферлар ойнаси ёпилишига эса жуда оз вақт қолмоқда. Агар кўк-анорранглилар клубига ўтиш ўхшамаса, унда португалиялик футболчи ҳозирданоқ Саудия Арабистонидаги клублардан бирига кетишга мажбур бўлиши мумкин.

Клеман Лангле, 28 ёш

• Қаердан: «Барселона»
• Қаерга: «Астон Вилла», «Севиля», «Бетис», «Лион»

«Барселона» учун ҳозир нафақат футболчилар сотувидан пул ишлаш, балки маошлар ведомостини бўшатиш ҳам муҳим. Каталонияликлар анчадан буён қутулишни истаётган футболчилардан бири франциялик ҳимоячи Клеман Лангледир.

Хави уни ўтган мавсумдаёқ режаларидан чиқарган — футболчи ўтган мавсумда ижара асосида «Тоттенҳэм»да ўйнайди, аммо энди каталонияликлар Ланглени бутунлай сотмоқчи. «Ан-Наср»дан таклиф бўлганди, аммо француз ҳимоячиси Европада қолишни истади ва Криштиану Роналдуга жамоадош бўлмайдиган бўлди. Унга топ-клублардан қизиқиш йўқ, аммо у ишсиз қолмаслиги ҳам аниқ. Фабрицио Романо хабарига кўра, уни «Астон Вилла» олиб кетмоқчи, фақат ижарага.

Рандал Коло Муани, 24 ёш

• Қаердан: «Айнтрахт»
• Қаерга: «ПСЖ»

Франция миллий жамоаси аъзоси, ЖЧ-2022 финалида 123-дақиқада дарвозабон билан яккама-якка вазиятда гол ура олмагани билан ёдда қолган ушбу ҳужумчи савияси аллақачон «Айнтрахт» даражасидан ўзиб кетган. Бир мавсум ичида Коло Муани оддий форварддан топ-клублар талабгор бўлган футболчига айланди, бу унинг бозордаги баҳоси ҳам (80 миллион евро), унга таклиф этилаётган пул ҳам кўрсатиб турибди.

«ПСЖ»да қайта қуриш кетмоқда: Неймар ва Месси кетди, Мбаппенинг келажаги ҳам ноаниқ бўлиб турибди, клуб олдидаги вазифалар эса олдингидек — барча совринлар учун курашиш. Бундай мақсад учун эса гол урадиган форвард даркор, Коло Муани — ажойиб вариант. «Айнтрахт» парижликларнинг 80 миллион евро миқдоридаги биринчи таклифини қайтарган, аммо уни 100 миллион еврога сотишга рози бўлади. Футболчи ҳам Францияга қайтишни истамоқда. Шу кунларда у Sky нашрига шундай деди: «Пари Сен-Жермен»га ўтиш — мен учун уникал имконият. Мен кетишни истайман, бу ҳақда раҳбариятни хабардор қилганман. Умид қиламанки, «Айнтрахт» Парижнинг таклифини қабул қилади ва менинг трансферим амалга ошади».

Ансу Фати, 20 ёш

• Қаердан: «Барселона»
• Қаерга: «Тоттенҳэм», «Брайтон»

Фати катталар футболига қуюндек кириб келганди, аммо жароҳатлар ушбу ёш испаниялик футболчининг ўсишига тўсқинлик қилди ва у эндиликда «Барселона»нинг сўзсиз асосий таркиб футболчиси ҳисобланмайди. Аммо Ансунинг истеъдоди йўқолмаган ва унга доимий ўйин амалиёти керак.

Испаниядаги исталган ўртамиёна клуб унинг учун ажойиб вариант бўларди, аммо унга Англиядан ҳам жиддий талаб мавжуд. Тўғри, ҳеч ким каталонияликлар сўраётган 70 миллион еврони тўламоқчи эмас аммо муқобил вариант ҳам бор — ижара. Фабрицио Романога кўра, «Тоттенҳэм» испаниялик футболчини бир мавсумга ижарага олиш бўйича таклиф билан чиққан. «Барса» ҳам қарши эмасдек, аммо бу даврда Фатининг маошини тўламоқчи эмас. Катта эҳтимол билан томонлар дедлайнгача келишишга улгуради.