Ғазо секторида БМТ Фаластин қочқинлар агентлигининг 11 нафар ходими ҳалок бўлди

Исроил-Фаластин можароси оқибатида 2 мингдан ортиқ одам қурбон бўлди.

Фото: AP

Исроил армиясининг Ғазо секторига ҳаводан берган зарбалари оқибатида Бирлашган Миллатлар Ташкилотининг Фаластинлик қочқинларга ёрдам кўрсатиш агентлигининг (UNRWA) 11 нафар ходими ҳалок бўлди. Бу ҳақда Reuters агентлиги ташкилот баёнотига асосланиб хабар берди.

Ҳалок бўлганларнинг беш нафари ўқитувчи, уч нафари ёрдамчи ходим, қолганлари гинеколог, муҳандис, психолог экани айтилмоқда.

«Баъзилар ўз уйида оилалари билан ҳалок бўлди. UNRWA қурбонлар яқинларига ҳамдардлик билдиради», дейилади ташкилот хабарида.

Ўз навбатида, Халқаро Қизил Хоч ва Қизил Ярим Ой Жамиятлари Федерацияси (IFRC) ўзининг беш аъзоси – тўрт нафари Ғазода ва бир нафари Исроилда ҳалок бўлганини маълум қилди.

Сўнгги маълумотларга кўра, ҲАМАС ҳужуми оқибатида 1200 нафардан ортиқ исроиллик ҳалок бўлган. Фаластин томони Исроил зарбалари оқибатида 1100 нафардан ортиқ қурбонлар ҳақида хабар берди.

Тайёрлаган Сардор Юсупов

#Исроил #Фаластин #Ғазо

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.