Гуржистон парламенти президент Зурабишвилига импичмент эълон қилолмади

Импичмент таклифи парламентда етарли овоз тўпламади.

Фото: AP

Гуржистон парламенти президент Саломе Зурабишвилига импичмент эълон қилолмади, деб хабар берди Гуржистон «Биринчи» телеканали. Импичмент эълон қилиш учун Гуржистон парламентининг 150 нафар депутатидан 100 нафари ёқлаб овоз бериши керак эди.

18 октябр куни бўлиб ўтган йиғилишда 86 нафар депутат импичментни қўллаб-қувватлади, бир нафари қарши овоз берди. Парламентнинг қолган аъзолари овоз беришда қатнашмади.

Жараён парламентда 84 ўринга эга бўлган ҳукмрон «Гуржистон орзуси» партияси томонидан бошланган эди.

Овоз бериш бошланишидан олдин «Гуржистон орзуси» парламент фракцияси раҳбари Ираклий Кобахидзе депутатлар олдида сўзга чиқиб, импичментни қўллаб-қувватловчи далилларни тақдим этди. Кейин Саломе Зурабишвили нутқ сўзлади. Гуржистон президенти нутқдан сўнг депутатлар саволларига жавоб беришдан бош тортди.

Гуржистон парламенти ўз тарихида биринчи марта президентга импичмент эълон қилишга уринди. Жараён Конституциявий суд томонидан тегишли рухсат берилганидан сўнг бошланди, у Зурабишвили ҳукуматнинг розилигисиз хорижга чиққанида ва расмийлар билан учрашганида Гуржистон Конституциясининг 52-моддасини бузганини тан олган.

Саломе Зурабишвили 2018 йилнинг 16 декабридан буён Гуржистон президенти лавозимида ишлаб келмоқда. У бир неча бор ҳукумат қарорларини очиқчасига танқид қилган.

Парламент республикаси бўлган Гуржистонда президентнинг ваколатлари қонун билан чекланган.