Ғазодаги операцияда америкалик аскарлар иштирок этмаяпти – Пентагон

Пентагон АҚШ ҳарбийларининг Ғазодаги қуруқлик операциясида иштирок этаётгани ҳақидаги хабарни инкор қилди.

Фото: Globallookpress

«АҚШ Қуролли кучлари Ғазодаги қуруқлик операцияларида қатнашмаяпти», дейилади Пентагон баёнотида.

Аввалроқ, Эроннинг Tasnim агентлиги Ғазода АҚШ Қуролли кучларининг 5 минг аскари жанг қилаётгани ҳақида ёзган эди.

Аввалроқ, АҚШ Мудофаа вазирлиги Исроилни қўллаб-қувватлаш мақсадида юбориш учун икки мингга яқин аскарни танлаб олгани, уларга маслаҳат бериш ва тиббий ёрдам кўрсатиш вазифаси юклатилиши, уларнинг жанговар ҳаракатларда иштирок этмаслиги, аскарлар жанговар тайёр ҳолатга келтирилмагани ҳақида хабар берилган эди.

Шу билан бирга, АҚШ Мудофаа вазирлиги «Жералд Форд» ва «Дуайт Эйзенхауэр» авиаташувчи кемалари бошчилигида Ўрта ер денгизининг шарқий қисмига иккита зарба гуруҳини юборди. Пентагон раҳбари Ллойд Остин таъкидлаганидек, бу «Исроилга қарши душманлик ҳаракатларини тийиб туриш ва урушни кенгайтиришга қаратилган ҳар қандай уринишларга қарши чораларнинг бир қисми сифатида» амалга оширилган.

Тайёрлаган Сардор Юсупов

#АҚШ #Исроил #Фаластин

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.