AQSh ikki ming askarni Isroilga yordam berish uchun jo‘natmoqchi – OAV

AQSh Mudofaa vazirligi Isroilni qo‘llab-quvvatlash maqsadida yuborish uchun ikki mingga yaqin askarni tanlab oldi, deb yozdi The Wall Street Journal (WSJ) Pentagondagi manbasiga tayanib.

Rasmiyga ko‘ra, harbiylarga maslahat va tibbiy yordam ko‘rsatish vazifasi yuklanadi. Amerika askarlari jangovar harakatlarda ishtirok etmaydi, piyoda askarlar jangovar tayyor holatga keltirilmagan.

Hozirgi vaqtda qo‘shinlar Yaqin Sharqda ham, undan tashqarida ham, shu jumladan Yevropada ham joylashtirilgan. WSJ ta’kidlaganidek, Qo‘shma Shtatlar Isroilda qanday sharoitda va qayerda qo‘shinlarini joylashtirishi mumkinligi noma’lum. Biroq Pentagonning qarori Jozef Bayden ma’muriyati G‘azo sektorida quruqlik operatsiyasi o‘tkazilsa, Isroil armiyasini qo‘llab-quvvatlashga tayyorlanayotganidan dalolat beradi.

Avvalroq AQSh Mudofaa vazirligi «Jyerald Ford» va «Duayt Eyzenxauer» aviatashuvchi kemalari boshchiligida O‘rta yer dengizining sharqiy qismiga ikkita zarba guruhini yuborgan edi. Pentagon rahbari Lloyd Ostin ta’kidlaganidek, bu «Isroilga qarshi dushmanlik harakatlarini tiyib turish va urushni kengaytirishga qaratilgan har qanday urinishlarga qarshi choralarning bir qismi sifatida» amalga oshirilgan.

G‘azo sektorini nazorat qilayotgan HAMAS harakati a’zolari 7 oktyabr kuni Isroilga hujum qildi. Ular mamlakatga minglab raketalar bilan zarba berib, so‘ngra chegara hududlariga bostirib kirib, tinch aholi va harbiy xizmatchilarni o‘ldirib, garovga oldilar. Isroil mudofaa kuchlari bunga javoban G‘azo sektoriga katta zarbalar berdi. Isroil rasmiylari mamlakat urush holatida ekanini rasman e’lon qildi. Isroil armiyasi G‘azo sektorida quruqlikdagi operatsiyaga tayyorgarlik ko‘rmoqda.