Исроил Эрдўған баёноти туфайли Туркиядаги барча дипломатларини чақириб олади

Туркия президенти Исроилни «босқинчи» деганидан сўнг, икки мамлакат ўртасидаги муносабатлар ёмонлашиш арафасида.

Фото: Getty Images

Исроил ташқи ишлар вазири Эли Коэн Туркия расмийларининг баёнотлари ортидан Исроил-Туркия муносабатларини қайта кўриб чиқиш учун барча дипломатларини Туркиядан чақириб олишни буюрганини айтди.

«Туркиянинг баёнотларидан келиб чиқиб, мен Туркия ва Исроил ўртасидаги муносабатларни қайта кўриб чиқиш учун Туркиядан дипломатик вакилларни чақириб олишни буюрдим», деб ёзди Коэн ижтимоий тармоқда.

28 октябр куни Истанбулда Туркия президенти Ражаб Тоййиб Эрдўған Фаластинни қўллаб-қувватловчи оммавий намойишда сўзга чиқди. Бошқа нарсалар қаторида, у Исроилни «босқинчи» деди ва ҳарбий жиноятларда айблади. Шунингдек, Фаластиннинг ҲАМАС ҳаракатини «террорчи гуруҳ эмаслигини» яна бир бор таъкидлади.

25 октябр куни Туркия президенти Исроилнинг Ғазо секторидаги ҳаракатларини танқид қилди. Шунингдек, у Исроилга расмий ташрифини бекор қилганини айтган эди.

Тайёрлаган Сардор Юсупов

#Туркия #Исроил #Ражаб Тоййиб Эрдўған

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.