Рақобат қўмитаси раисининг лавозимга лойиқлиги кўриб чиқилади

Президент йирик савдо тармоқларида маҳаллий ишлаб чиқарувчиларга тенг шароит яратилмагани ва бошқа ҳолатларни Рақобат қўмитаси фаолиятидаги “жиддий камчиликлардан далолат” деб атади.

Фото: Президент матбуот хизмати

Ўзбекистон Рақобатни ривожлантириш ва истеъмолчилар ҳуқуқларини ҳимоя қилиш қўмитаси раиси Шоҳрух Шораҳмедов лавозимида озод этилиши мумкин.

Президент ўтказган 9 ноябр кунги селекторда сут ишлаб чиқарувчиларни қўллаб-қувватлаш масаласи кўриб чиқилди. Сариёғ экспортига чекловни бекор қилиш, сут етиштирувчи ва қайта ишловчи корхоналарни давлат томонидан қўллаб-қувватлаш чораларини ишлаб чиқиш бўйича ҳукуматга топшириқ берилди.

Йирик чакана савдо тармоқларида сотилаётган қуруқ ва табиий сутдан ишлаб чиқарилган маҳсулотларни алоҳида белгилаш амалиётини жорий этиш, кўчма гўшт-сут шохобчаларини ташкил қилиш зарурлиги таъкидланди.

Йирик савдо тармоқларида маҳаллий ишлаб чиқарувчиларга тенг шароит яратилмагани, улардан маҳсулот пулини олишдаги муаммолар, аҳолида маҳсулот сифати ва нарх-навоси бўйича шикоятлар кўплиги Рақобат қўмитаси фаолиятидаги жиддий камчиликлардан далолат экани таъкидланди.

Шу муносабат билан қўмита раиси Ш.Шораҳмедовнинг эгаллаб турган лавозимига лойиқлиги масаласини кўриб чиқиш топширилди.