Эрон Исроил ва ҲАМАС ўртасидаги урушга бевосита аралашмоқчи эмас – ОАВ

ҲАМАС ҳужуми Эрон ва унинг иттифоқчилари учун мутлақо кутилмаган воқеа бўлгани айтилмоқда.

Фото: Reuters

Эрон Исроил ва ҲАМАС ўртасидаги урушга бевосита аралашишни режалаштирмайди, аммо гуруҳни «сиёсий ва маънавий» қўллаб-қувватлашда давом этади. Бу ҳақда Reuters икки томон вакилларига таяниб хабар берди.

Қайд қилинишича, ноябр ойи бошида Теҳронда ҲАМАС раҳбари Исмоил Ҳания билан учрашувда Эрон олий раҳбари Оятуллоҳ Али Хоманаий унга қарата: «Сиз бизни 7 октябр куни Исроилга ҳужум қилишингиз ҳақида огоҳлантирмадингиз ва биз сизнинг номингиздан бу урушга бормаймиз», деб аниқ айтган.

ҲАМАС ҳаракатидаги манбага кўра, учрашувда Эрон раҳбари ўз суҳбатдошига Эронни ва Ливандаги «Ҳизбуллоҳ» гуруҳини Исроилга қарши курашга қўшилишга чақираётган фаластинликларнинг овозини ўчиришни сўраб, босим ўтказган. Қайд этилишича, «Ҳизбуллоҳ» ҳам ҲАМАС ҳужумидан бехабар бўлган.

Шунга қарамай, Эрон ҳамон ўзининг қуролли гуруҳлари тармоғидан, жумладан, «Ҳизбуллоҳ»дан Исроил ва Американинг Яқин Шарқдаги нишонларига ракета ва дронлар ҳужуми учун фойдаланишда давом этиш ниятида, дейди манбалар.

«Стратегия Ғазодаги ҲАМАС билан бирдамликни кўрсатиш ва Исроил қўшинларини чалғитишдан иборат. Аммо Қўшма Штатларни можарога жалб қилмаслик учун Исроил билан тўғридан-тўғри тўқнашувга киришилмайди», деган манбалар.

#Эрон #Исроил #Ҳамас

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.