Полшада Россия фойдасига жосусликда айбланган 16 кишининг иши судга юборилди

Полша прокуратураси Россия манфаатлари йўлида жосуслик тармоғини яратишда гумон қилинган 16 киши иши бўйича айблов хулосаларини судга тақдим этди. Бу ҳақда 22 ноябр, чоршанба куни RMF FM радиостанцияси хабар берди. 

Прокуратура 16 кишини уюшган жиноий гуруҳда иштирок этганликда ва Полша манфаатларига зид бўлган хорижий разведка манфаатларига қаратилган фаолиятда айбламоқда. Гумонланувчиларга 10 йилгача қамоқ жазоси берилиши мумкин. 

«Айбланувчилар муҳим инфратузилма объектлари, ҳарбий объектлар ва денгиз портларини аниқлаш каби тадбирларни амалга оширган», деб хабар берди прокуратура. Айбловга кўра, жосуслик тармоғи аъзолари «мижозларини ўзларининг разведкалари натижаларидан хабардор қилиб турган, бунинг учун пули олган». 

Айбланувчилар Украинага ҳарбий ёрдам етказилишини кузатган 

Бошқа нарсалар қатори, қўлга олинганлар Украинага ғарб ҳарбий ёрдамларини олиб ўтиш йўналишларига веб-камералар қўйиш ва уларга GPS-трекерларни ўрнатишга уринишда айбланмоқда. Прокуратура маълумотларига кўра, улар Полшага қарши ташвиқот ҳам олиб борган ва диверсия тайёрлаган. 

Полша махсус хизматлари гумонланувчиларнинг фуқаролигини ошкор этмади, фақат улар «шарқий чегарадан келган хорижликлар» эканини билдирди. Бу иш бўйича қўлга олинганлардан бири биринчи лига клубларидан бирида ўйнаган 20 ёшли россиялик ҳоккейчи бўлди, деб хабар берди RMF FM. У 2021 йилдан бери Полшада истиқомат қилади. Мамлакат махсус хизматлари таъкидлашича, ушланган шахс ҳарбий объектлар ва муҳим инфратузилмаларни аниқлаш ва суратга олиш билан шуғулланган. 

Айғоқчиликда айбланаётганлар 2023 йилнинг январидан мартигача Бела Подляска, Хелм, Медик, Перемишл, Жешув, Варшава ва мамлакатнинг бошқа ҳудудларида, жумладан Помореда фаолият юритган, дейилади прокуратура хабарида.