Сурхондарёда ноқонуний қум-шағал қазиб олиш натижасида табиатга 52 млн сўмлик зарар етказилди

Сурхондарё вилояти Сариосиё тумани ҳудудидан оқиб ўтувчи «Обизаранг» дарёси ёқасидан ноқонуний қум-шағал қазиб олиш ҳолати аниқланди, деб хабар берди Экология, атроф-муҳитни муҳофаза қилиш ва иқлим ўзгариши вазирлиги.

Таъкидланишича, вилоят экология бошқармаси томонидан «Cангардак Тош» МЧЖда тегишли тартибда экологик текширув ўтказилган. 

Ноқонуний тарзда қум-шағал қазиб олиниши натижасида табиатга 52 млн 260 минг сўмлик зарар етказилган.

Ҳолат юзасидан «Cангардак Тош» МЧЖ раҳбари М.Х.га нисбатан Маъмурий жавобгарлик тўғрисидаги кодекснинг 70прим 1-моддасининг 1-қисмига кўра маъмурий баённома расмийлаштирилган. 

Белгиланган жарима ва табиатга етказилган зарарни ундириш мақсадида тўпланган ҳужжатлар суд органларига тақдим этиш учун тайёрланмоқда, дейилади вазирлик хабарида.

Аввалроқ Тошкент шаҳрида ноқонуний қум-шағал қазиб олиш оқибатида табиатга 35 млрд сўм зарар етказилгани, ҳолатга ҳуқуқий баҳо бериш, айбдорларга нисбатан қонуний чора кўриш ва табиатга етказилган зарарни ундиришда мақсадида тўпланган ҳужжатлар Бош прокуроратурага юборилгани ҳақида хабар берилганди.