“Диплом эмас, тажриба муҳим”: 8 тилни биладиган 25 ёшли Ҳожимурод ҳикояси

Сурхондарёлик Ҳожимурод Шоймардонов етти йилдан бери хорижда яшаб, турли мамлакатларда ишлаб келмоқда. Россиядан Болгариягача, Туркиядан Малайзиягача бўлган иш тажрибаси унга хизмат кўрсатиш соҳаси, меҳнат миграцияси ва таълим ҳақида ўз қарашларини шакллантириш имконини берган. Kun.uz мухбири суҳбатда у чет елдаги ҳаётнинг паст-баландликлари ва Малайзиядаги фаолияти ҳақида гапириб берди.

Бугун минглаб ўзбекистонликлар хорижга яхши даромад излаб кетмоқда. Кимдир қурилишда, кимдир ишлаб чиқариш, яна кимдир хизмат кўрсатиш соҳасида меҳнат қилади. Аммо кўп ҳолларда одамлар фақат топилган пулни кўради. Ўша маблағ ортидаги масъулият, руҳий босим ва тажриба зарурияти кўзга ташланмайди. Ҳожимуроднинг ҳикояси эса ана шундай қарашларни бироз ўзгартириши мумкин.

Сурхондарё вилояти Бойсун туманида туғилган 25 ёшли Ҳожимурод мактабни тамомлагач олий таълимга кира олмайди. Бир муддат санъат йўналишида фаолият юритиб, овозлаштириш ишлари билан шуғулланади. Бироқ унинг айтишича, мазкур соҳада ўша пайтда барқарор даромад топиш қийин бўлган.

“Санъатга қизиқишим кучли эди, дубляж билан шуғулланардим. Аммо вақт ўтгани сари фақат қизиқиш билан яшаб бўлмаслигини тушундим. Оилага таянч бўлиш, барқарор даромад топиш керак эди. Шу сабаб ўзимни бошқа соҳада синаб кўришни бошладим”, – дейди у.

Шундан сўнг, Ҳожимурод ўзи қизиққан бошқа йўналишда ишлашни бошлайди. Аммо маҳаллий меҳнат бозоридаги маошлар унинг кутилмаларига жавоб бермайди. Оқибатда хорижда ишлашга қарор қилади. Илк манзили Россия бўлади. Дастлаб оддий ишчи сифатида меҳнат қилган Ҳожимурод рус тилини яхши билгани туфайли кейинчалик логистика компаниясига ишга таклиф этилади.

“Дастлаб бошқа мигрантлар сингари оддий жисмоний меҳнатдан бошладим. Ўша давр менга интизом ва масъулиятнинг аҳамиятини ўргатди. Иш жараёнида рус тилини эркин билишим эътиборга тушди ва кўп ўтмай логистика компаниясидан таклиф олдим. Бу ерда ҳужжатлар билан ишлаш, юк ташиш занжирини мувофиқлаштириш, турли миллат вакиллари билан мулоқот қилиш каби вазифаларни бажардим. Ўшанда бир нарсани аниқ англадим: хорижда фақат меҳнаткаш бўлишнинг ўзи етарли эмас, тил билиш ва янги кўникмаларни эгаллаш инсонни оддий ишчидан мутахассис даражасига олиб чиқадиган энг муҳим омиллардан бири экан”, – дейди у.

Россиядаги фаолиятидан сўнг, Ҳожимурод Болгария, Озарбойжон, БАА ва Туркияда ҳам ишлаб, турли соҳаларда тажриба орттиради. Бугун эса Малайзияда хизмат кўрсатиш соҳасида фаолият юритмоқда. Унинг айтишича, турли мамлакатларда ишлаш касбий тажриба билан бир қаторда, одамлар, маданият ва меҳнатга бўлган муносабатни чуқурроқ англаш имконини ҳам берган.

Ҳозирда Ҳожимурод ўзбек, рус, тожик, араб, форс, инглиз, ҳинд ва урду тилларида эркин мулоқот қила олади. Бироқ бу қобилият бир кунда шаклланмаган. Ҳар бир тилни ўрганиш ортида юзлаб соатлик меҳнат, хатолар ва мунтазам машқ ётади. Айнан шу меҳнат кейинчалик унга турли мамлакатларда бемалол ишлаш, янги одамлар билан тез тил топишиш ва касбий фаолиятида ўсиш имконини берган.

“Кўпчилик тилни шунчаки гаплашиш воситаси деб ўйлайди. Аслида эса у янги имкониятлар калити. Тил билсангиз, одамлар сизга бошқача қарайди, ишонч билдиради. Ишда ҳам масъулиятингиз ортади, чунки турли давлатлардан келган мижозлар ёки ҳамкасблар билан бемалол ишлай оласиз”, – дейди у.

Ҳожимурод айни вақтда Малайзияда ресторан бошқаруви ва мижозларга хизмат кўрсатиш йўналишида ишлайди. Йигитнинг айтишича, хорижда мазкур касбга оддий иш эмас, масъулият ва профессионаллик талаб қиладиган соҳа сифатида қаралади.

“Бу ерда официант ёки сервис ходими шунчаки буюртма олиб келадиган одам эмас. У ресторан обрўйини шакллантирадиган асосий инсонлардан бири ҳисобланади. Мижоз билан мулоқот, муаммони ҳал қилиш, жамоа билан ишлаш – буларнинг барчаси юқори даражада баҳоланади. Фаолиятимдан келиб чиқиб айтадиган бўлсам, бир куннинг ўзида малай, хитой, ҳинд ва Яқин Шарқ давлатларидан келган одамлар билан ишлашингиз мумкин. Шунинг учун нафақат тил билиш, балки одамлар менталитетини тушуниш ҳам жуда муҳим”, – дейди у.

Суҳбат давомида Ҳожимурод ёшлар орасида кенг тарқалган “аввал диплом, кейин иш” деган қарашга ҳам муносабат билдирди. Унинг фикрича, замонавий меҳнат бозорида диплом муҳим бўлса-да, иш берувчилар учун амалий тажриба ҳамда кўникмалар кўпроқ аҳамият касб этмоқда.

“Мен олий таълимни тамомламаганман. Лекин шу пайтгача ишлаган жойларимнинг деярли ҳеч бирида мендан диплом сўрашмаган. Уларни қизиқтирган нарса қандай ишлашим, муаммоларни ҳал қила олишим ва жамоага фойда бера олишим бўлган. Диплом, албатта, керак, лекин у тажрибанинг ўрнини боса олмайди. Бугунги дунёда инсон ўз устида ишлашдан тўхтамаса, имкониятлар барибир топилади”, – дейди у.

Интервюни тўлиқ шаклда Kun.uz’нинг YouTube’даги саҳифасида томоша қилишингиз мумкин.