Киев россияликларни 2024 йилги Олимпиадага киритиш ғоясини танқид қилди

Украина ёшлар ва спорт вазири Матвей Бедний 5 декабр куни Лозаннада бўлиб ўтган Олимпия саммитида бир қатор миллий олимпия қўмиталари ва спорт федерациялари томонидан билдирилган Россия ва Беларус спортчиларини 2024 йилги Олимпиадага нейтрал мақомда киритиш таклифини танқид қилди. Бу ҳақда 7 декабр, пайшанба куни вазирлик сайтида эълон қилинган баёнотда айтилади.

Вазир Халқаро олимпия қўмитаси (ХОҚ) масъулият билан ҳаракат қилиб, Россия ва Беларус вакилларига нейтрал байроқ остида қатнашишни тақиқлайди ва «Россияга спортдан ҳарбий ташвиқот учун фойдаланишига йўл қўйиб бермайди», деб умид билдирди. Унинг қайд этишича, Россия уч марта – 2008, 2014 ва 2022 йилларда Олимпиада келишуви тамойилини бузган дунёдаги ягона давлатдир.

Вазирнинг сўзларига кўра, украиналиклар бетарафлик тамойилини ҳурмат қилади, бироқ бетарафлик фақат тинчлик даврида мумкиндир. Уруш бўлиб, бир миллат бошқа миллатни ўлдирса, «бетарафлик» масъулиятсизликка айланади, дейди у.

Вазир: Россия паспортидан воз кечганидан кейин мусобақаларга киритиш керак

Бедний таъкидлашича, россиялик спортчиларнинг Олимпия ўйинларида иштирок этиши учун ягона имконият - бу Россия паспортидан воз кечиш. «Бугунги кунда бу спортчи учун спорт ютуқлари унинг асосий устуворлиги эканлигини ва у украиналикларнинг қотиллиги учун жавобгарликни ўз зиммасига олмаслигини исботлашнинг ягона мумкин бўлган йўлидир», деб таъкидлади у. Шу билан бирга, Спорт вазирлиги раҳбари Украина ХОҚ ижроия қўмитасининг аввалроқ Россия учун мусобақаларда қатнашган спортчиларга фуқаролигини ўзгартиришга рухсат бериш ҳақидаги қарорини қўллаб-қувватлашини қўшимча қилди.

Агар Россиядан спортчилар қатнашишига рухсат берилса, украиналик спортчиларнинг иштироки сўроқ остида қолади. «Ахлоқий нуқтайи назардан, сизни ўлдирмоқчи бўлганлар билан рақобат қилиш қийин - мажозий маънода эмас, том маънода», деди Бедний. Унинг сўзларига кўра, украиналик спортчилар доимо россияликларнинг провокацияларига дучор бўлади.