ЕИ январда Украинага 50 млрд евро ажратиш бўйича саммит ўтказади

Европа Иттифоқи раҳбариятига кўра, Венгриядан ташқари Европа Иттифоқининг барча давлатлари Киевга янги ёрдам пакетини тақдим этишга тайёр. Еврокомиссия раҳбари Урсула фон дер Ляйен ёрдам бўйича қарор Венгрия иштирокисиз қабул қилинишини истисно этмади.

Фото: Picture Alliance

Евроиттифоқ 2024 йил бошида навбатдан ташқари саммит ўтказиб, Украинага 50 миллиард евро миқдорида янги молиявий ёрдам пакетини ажратиш тўғрисида қарор қабул қилади. Бу ҳақда Европа кенгаши раҳбари Шарл Мишел ва Еврокомиссия раҳбари Урсула фон дер Ляйен 15 декабр, жума куни хабар берди. Ушбу пакет Брюсселда якунланган Европа Иттифоқи саммитида тасдиқланиши режалаштирилган эди, аммо Венгрия вето қўйгани сабабли буни амалга ошириб бўлмади. Энди Венгрия бош вазири Виктор Орбанни ишонтиришга янги уриниш бўлади, чунки қарор бир овоздан қабул қилиниши керак. Мишел Европа Иттифоқининг қолган 26 давлати Украинага кўп миллиардлик янги ёрдам пакетини тақдим этишга тайёрлигини таъкидлади.

Евроиттифоқ «Б режа» такрорланиши мумкинлигини истисно этмаяпти

Шу билан бирга, Урсула фон дер Ляйен Венгрия томонидан яна қаршилик кўрсатилса, Киевга янги ёрдам пакети Будапешт розилигисиз тасдиқланиши мумкинлигини истисно этмади. «Албатта, биз Европа Иттифоқининг барча 27 давлати томонидан қўллаб-қувватланадиган ечим устида жадал ишлаяпмиз, аммо эҳтимолий муқобил вариантларни кўриб чиқиш зарур», деди у.

Ўз навбатида, Шарл Мишел, агар керак бўлса, Украинага янги ёрдам пакети ЕИ бюджетидан ташқари давлатлараро шартномалар даражасида келишилиши мумкинлигини айтди.

Брюсселда бўлиб ўтган ЕИ саммитида 26 аъзо давлат Орбаннинг мажлислар залида вақтинча йўқлигидан фойдаланиб, Украинанинг Европа Иттифоқига қўшилиши бўйича музокараларни бошлашга қарор қилди.