Боласини шафқатсизларча урган ва жасадини ерга кўмган ўзбекистонлик аёл ва эркак Россияда ушланди

Кичик ёшдаги боласини шафқатсизларча ураётгани, шунингдек, кейинчалик унинг жасадини ерга кўмаётгани тасвирланган видеолавҳадаги аёл ва эркак Россияда ушланди. Бу ҳақда болалар омбудсмани Сурайё Раҳмонова хабар берди. 

Қайд этилишича, тахминан 1 ёшдаги боласини шафқатсизларча ураётгани ва кейинчалик унинг жасадини ерга кўмаётгани тасвирланган видеолавҳалар ижтимоий тармоқларда тарқалганидан кейин, болалар омбудсмани ҳуқуқни муҳофаза қилувчи органларга мурожаат қилган. 

Шундан сўнг, тасвирдаги аёл Андижон вилояти, Жалақудуқ туманида яшовчи 1995 йилда туғилган А.Г. экани, у 2016 йилдан бери Россиянинг Новосибирск шаҳрида турмуш ўртоғи Б.И. билан яшаётгани, бола эса уларнинг 2019 йилда туғилган фарзанди экани аниқланган. 

Мазкур ҳолат юзасидан Ўзбекистон бош прокуратураси сўровига асосан Ўзбекистоннинг Бош консулхонаси ҳамда Новосибирск области ИИВ ходимлари билан тезкор маълумот алмашилган. Натижада, 19 январ куни А.Г. ва Б.И. Россиянинг Бердянск шаҳрида қўлга олиниб, просессуал тартибда ушланган. 

Таъкидланишича, Россия Тергов қўмитасининг Новосибирск шаҳри бошқармаси томонидан аёл ва эркакка нисбатан Россия Жиноят Кодексининг 117-моддаси (қийнаш) билан жиноят иши қўзғатилган ва тергов ҳаракатлари олиб борилмоқда.