Полша ва Болтиқбўйи мамлакатлари Россиядан СТГ импортини тақиқлашни таклиф қилди

Полша ва Болтиқбўйи давлатлари Россияга қарши санкцияларнинг 13-тўпламига Россия Федерациясидан суюлтирилган табиий газ (СТГ) ва алюминий импорти бўйича тақиқни киритишни таклиф қилмоқда, деб хабар берди DW’нинг Брюсселдаги мухбири 23 январ, сешанба куни Полша расмийсига таяниб. Бундан ташқари, Полша ва Болтиқбўйи мамлакатлари илмий ҳамкорлик ва қўшма илмий тадқиқотларни молиялаштиришни тақиқлашни таклиф этмоқда. Тўрт давлатнинг бошқа таклифлари қаторига санкцияларни четлаб ўтишга қарши кейинги чора-тадбирлар, авиация соҳасида чекловларни кучайтириш ва дронларни ишлаб чиқаришда қўлланиши тақиқланган маҳсулотлар рўйхатини кенгайтириш киради.

2023 йилда Европа Иттифоқи давлатлари Россиядан СТГ импортини урушдан олдинги даврга нисбатан 40 фоизга оширди, деб ёзади Reuters. Энг йирик импортчилар Испания ва Белгия бўлди. Испания энергетика вазири Тереза Рибера Reuters’га берган интервюсида Россиянинг СТГ масаласи Европа Иттифоқида санкциялар бўйича музокаралар мавзуси бўлишини айтган эди. 

13-санкциялар пакети муҳокамаси

Европа Иттифоқи давлатлари ўтган ҳафта Россиянинг Украинага ҳужуми учун янги санкциялар пакетини муҳокама қила бошлади, деб хабар берди Bloomberg. Кейинги, 13-санкциялар тўплами уруш бошланганининг икки йиллиги - 24 февралда қабул қилиниши режалаштирилган. Унга жисмоний ва юридик шахсларнинг янги рўйхати, янги савдо чекловлари ва Европа Иттифоқидаги компаниялар орқали ҳам, учинчи мамлакатларда ҳам санкцияларни четлаб ўтишга қарши қўшимча чора-тадбирлар киритилиши кутилмоқда, деб ёзади Bloomberg. 

Европа Иттифоқи элчиларининг учрашувида санкциялар муҳокама қилинди. 24 февралгача келишувга эришиш осон бўлмайди, чунки аввалги пакетни тасдиқлаш учун бир неча ҳафталик музокаралар керак бўлган, дея таъкидлайди агентлик.