Трамп ўзининг вице-президенти лавозимига эҳтимолий номзодларни санади

Рўйхатда унинг праймериздаги рақиблари ҳам бор.

Фото: AP

АҚШ собиқ президенти Доналд Трамп мамлакат етакчиси лавозими учун курашда ўзининг вице-президенти бўлишга эҳтимолий номзодларни санаб ўтди. У 6 нафар сиёсатчини номлади, деб хабар берди Fox News нашрига таяниб «Интерфакс».

«Тўғрисини айтсам, бу одамларнинг барчаси яхши. Улар яхши, ишончли одам», деди у телеканалга берган интервюсида.

Рўйхатга Трампнинг республикачилар праймеризидаги собиқ рақиблари – Флорида губернатори Рон ДеСантис, сенатор Тим Скотт ва тадбиркор Вивек Рамасвами киритилди. Трамп, шунингдек, Жанубий Дакота губернатори Кристи Ноэм, Вакиллар палатаси аъзоси Байрон Доналдс ва 2022 йилда Демократик партияни тарк этган собиқ вакил Тулси Габбардни ҳам вице-президент лавозимига салоҳиятли номзодлар деб атади.

Fox News нашрининг таъкидлашича, Трамп кўпинча бундай баёнотларни тайёргарликсиз беради ва бу рўйхат тўғри бўлмаслиги мумкин. Хусусан, канал Десантис вице-президент лавозимига номзод бўлиши мумкинлигига шубҳа қилмоқда, чунки ўтган йил давомида сиёсатчилар бир-бирини кўп бора танқид қилишган.

Партия ичидаги сайловлар июн ойида якунланади. Президентликка номзод эълон қилинадиган Республикачилар партиясининг қурултойи июл ойида бўлиб ўтади.

АҚШ президенти сайлови 2024 йил 5 ноябрга белгиланган.