Халқаро исломий савдо-молия корпорацияси (ITFC) 2018 йилдан буён Ўзбекистонда савдо-сотиқни ривожлантириш учун молиявий кўмак кўрсатиб келмоқда. Ушбу халқаро молия институти Ўзбекистонга 750 млн доллардан ортиқ инвестиция ажратган.
Корпорация бош директори Хане Салем Сонбол Тошкентга ташрифи давомида Kun.uz'га берган интервюсида ташкилотнинг Ўзбекистон ҳукумати, марказий банки ва тижорат банкларида исломий молия ҳақида хабардорликни ошириш ҳамда савдони молиялаштириш бўйича ҳамкорликни кенгайтиришга тайёр эканини айтиб ўтди.
— Жаноб Сонбол, корпорация ва унинг Ўзбекистондаги фаолияти ҳақида қисқача маълумот бера оласизми?
— Халқаро исломий савдо корпорацияси савдони молиялаштириш соҳасида халқаро ислом ҳамкорлигига эътибор қаратади. Бу корпорация Ислом тараққиёт банки гуруҳига киради, гуруҳнинг савдо бўлими ҳисобланади. Биз савдони молиялаштириш билан шуғулланамиз, шунингдек, савдони ривожлантириш дастурларимиз ҳам бор.
Ўзбекистон – гуруҳга аъзо давлат ва биз кўп жиҳатдан стратегик ҳамкормиз. Биз Ўзбекистонда анчадан бери ишлаймиз. Бугунги кунга қадар 750 миллион долларга яқин ҳамкорлик битимларини имзоладик. Бу – Ўзбекистон билан имзоланган биринчи битим доирасида бўлди. Бугун эса яна бир ҳамкорлик шартномасини имзоладик. Умид қиламанки, у ҳам биринчиси каби муваффақиятли бўлади.
Биз, албатта, ўз саъй-ҳаракатларимизни нафақат ҳукуматни, балки хусусий сектор ва молия институтларини ҳам қўллаб-қувватлашга қаратдик. Ўзбекистондаги кўплаб молия институтлари билан ишлаганмиз. Шунингдек, биз маслаҳат хизматларини тақдим этдик. Исломий молиялашда биз Ўзбекистон расмийларига корпорацияни қўллаб-қувватлаганликлари учун миннатдорчилик билдирамиз. Ҳозирда янги ҳамкорлик шартномаси бўйича портфелни диверсификация қилишга ҳаракат қилмоқдамиз ва умид қиламизки, портфелга янги секторлар кириб келишади.
— Корпорация шариат қонунлари асосида савдо-молия операцияларини амалга оширади, бу нима дегани ва у нималарни ўз ичига олади?
— Ҳа, биласизки, исломий молия ҳақиқатан ҳам инсониятга хизмат қиладиган бир қанча устунларга эътибор қаратади ва бу нафақат фоизсиз молиялаштириш, балки у кўпроқ исломий молия талаб қиладиган ахлоқий соҳаларни қамраб олади. Биз ислом банки механизмлари ва исломий молиялаштириш механизмлари ҳақида кўпроқ хабардор бўлишлари учун Ўзбекистондаги молия институтларини қўллаб-қувватладик. Чунки тушундикки, молиявий институтлар орасида ҳақиқий конвертация қилиш ёки шу турдаги молиялаштиришга қаратилган дарчаларга эҳтиёж бор.
