Ҳоландда омадсиз кунлар, Испанияда интрига ўлмоқда. Кун ўйинлари
|17:05 / 17.03.202429 90718 мин
Беллингҳем ортидан Винисиус ҳам ҳакам билан баҳслашиб дисквалификацияга учради, Кейн жароҳат олди. Шанба оқшомида Европа футболида рўй берган асосий воқеалар, ўйинлардаги голлар ва турнир жадвалидаги вазият.
Фото: ROBBIE JAY BARRATT — AMA/GETTY IMAGESФото: ROBBIE JAY BARRATT — AMA/GETTY IMAGES
Англияда шу куни кубок турнири асосий планга чиқди, аммо бир учрашувдан иборат бўладиган чоракфиналда жиддий кураш кузатилмади. «Манчестер Сити» «Нюкасл»дан анча кучлироқ, қолаверса шу куни омад ҳам Хосеп Гвардиола жамоаси томонида бўлди. Дастлаб Бернарду Силванинг зарбаси Шерга тегиб, рикошет орқали бошқа томонга йўл олди ва Дубравкани иложсиз ҳолатда қолди. Португалиялик ҳужумчининг кейинги зарбаси ҳам дарвозабонга қийинчилик туғдирмайдигандек кўринганди, аммо зарба йўналишида турган Ботман тўпга бош билан тегинишга қарор қилди ва тўп яна дарвоза тўрига бориб тушди.
«Қарғалар» биринчи бўлимдаёқ икки гол ўтказиб юборди ва рақибга гол ура олмади, Эдерсоннинг жароҳати туфайли дарвозага қайтган Ортега Исакнинг жарима майдони ичидан йўллаган зарбасидан кейин феноменал сейв намойиш этди.
Иккинчи бўлимда «Сити» тўпга эгалик қилишда давом этди ва меҳмонларга қараганда уч баробар кўпроқ вазиятлар яратди (жами зарбалар бўйича 16:2, дарвоза соҳасига аниқ борган зарбалар бўйича 5:1). «Сити» ва АПЛнинг энг яхши тўпурари Ҳоланд эса бу мавсум ўтган мавсумдагидек сермаҳсул ўйин кўрсата олмаяпти (айниқса сўнгги ўйинларда). Англия Кубогининг олдинги босқичида норвегиялик ҳужумчи «Лутон» дарвозасига бешта гол урганди, бу сафар эса ўз вазиятларидан фойдалана олмади. У «Нюкасл» дарвозаси томон беш бор зарба йўллади, аммо ҳар сафар зарбалари хато кетди. У йил бошидан буён ўтказилган 12 ўйиндан 7 тасида майдонни голсиз тарк этишига тўғри келди.
Шунга қарамай, «Сити» ишончли ҳисобни ўйин охирига қадар сақлаб қолди ва Англиянинг қаторасига олти мавсумда кубок яримфиналига чиққан илк жамоасига айланди. «Шаҳарликлар» — Англияда даражаси бўйича иккинчи ўринда турувчи ушбу совриннинг амалдаги соҳиби саналади.
Шанба кунги ўйинлар доирасида «Ковентри» ҳам «Вулверҳэмптон» билан ўйинда қўшимча дақиқаларда икки гол уриб (3:2), яримфиналга чиқди. Якшанба кунги ўйинларда «МЮ» – «Ливерпул» ҳамда «Челси» – «Лестер» жуфтликлари кейинги икки яримфиналчи номига аниқлик киритади.
Кубок ўйинлари туфайли чемпионатдаги ўйинлар сони қисқарган, бу тур доирасида «Крейвен Коттеж»даги Лондон дербиси диққат марказида эди. «Тоттенҳэм» танаффусга қадар кўпроқ ҳужум уюштирди ва гол уриш учун етарлича вазиятлар яратди, аммо мезбонлар ҳам мунтазам равишда ва кескин жавоблар қайтариб турди. Бўлим охирида эса Робинсоннинг чап қанотдан уюштирган ҳужуми Родриго Муниз ҳисобни очиши билан якунланди. Иккинчи бўлим бошида эса Кастаннинг ўнг қанотдан узатмасига дарвозабон ҳудудига етиб келган Лукич оёқ қўйишга улгурди ва ҳисобдаги устунлик оширилди.
Бир ҳафта олдин кучли тўртлик учун тўғридан тўғри рақобатчиси бўлган «Астон Вилла»га сафарда жавобсиз тўртта гол урган «Тоттенҳэм»ни таниб бўлмай қолди. Агар мезбонларнинг яна бир голи офсайд туфайли бекор қилинмаганида ва Викарионинг қатор сейвлари бўлмаганида, бу ўйин протоколида ҳам 4:0 ҳисоби акс этган бўларди. Меҳмонлар қулай позициялардан ҳам гол ура олишмади ва жамоанинг АПЛда 39 учрашувдан иборат голли сериясига барҳам берилди. «Тоттенҳэм» ҳамон бешинчи ўринда ва ўйинлар сони тенг ҳолатида «Астон Вилла»дан икки очкога ортда қолмоқда.
«Реал» «Осасуна»га сафарда тўрт гол уриб, навбатдаги уч очкони қўлга киритди. Винисиус ўйин қаҳрамонларидан бири бўлди. Аммо у спортга хос бўлмаган ҳаракати туфайли «Атлетик»ка қарши муҳим учрашувни ўтказиб юборади.
Мадридликлар Беллингҳемсиз иккинчи ўйинни ўтказди: Жуд «Валенсия»га қарши ўйин охирида гол урган, аммо бунгача арбитр финал ҳуштагини чалиб бўлгани учун гол бекор қилинган, ҳакам билан баҳслашган футболчи эса қизил карточка олгади. Шу кунларда Марокаш миллий жамоасига ўтган Браим Диас унинг ўрнига ўйнамоқда. «Селта»га қарши олдинги ўйинда инглиз футболчисиз ҳам осон ғалабага эришилди (4:0).
Жамоадаги яна бир ўзгариш — Начо захирада қолдирилиши ва Тчуамени мудофаа марказидан жой эгаллаши билан боғлиқ. Милитао узоқ вақтлик жароҳатдан тузалмоқда — у бир ҳафта олдин шуғулланишни бошлади. Шундай экан, тез орада «Реал» ҳимоясидаги муаммолар камаяди.
«Осасуна»га қарши ўйиннинг 4-дақиқасидаёқ ҳисоб очилди — Винисиус чемпионатдаги 11-голини урди. Меҳмонлар ҳимоячиси Катена жарима майдони атрофида тўпни олдириб қўйди ва бразилиялик ҳужумчи яккама-якка вазиятдан фойдаланди. Лекин бир неча дақиқа ўтиб Будимир бурчак зарбасидан кейин мувозанатни тиклади. Бу мадридликлар жорий мавсумда стандарт вазиятдан кейин илк бор гол ўтказиб юбориши бўлди. Винисиус эса Рюдигернинг ҳимоячилар орасидан ўтказиб берган пасидан фойдалана олмади: яккама-якка вазиятда тўпни Эрреранинг оёқлари орасидан ўтказмоқчи бўлди, аммо дарвозабон қутқарди.
Жамоалар 18-дақиқага келиб 90 дақиқа учун етарли бўлган ҳужумлар уюштиришди, аммо Эррера ва Лунин ўз ишларини тўғри бажаришди. Кейин эса Валверденинг моҳирона ҳаракатларини марказий ҳужумчи позициясида пайдо бўлган Дани Карваҳал моҳирона зарбаси билан якунлаб берди.
Бўлим охирида эса Вини кераксиз вазиятда сариқ карточка олди: у майдоннинг рақиб қисмида қоида бузди, арбитр билан суҳбат вақтида эса кулиб қўл силкиди. Энди «Атлетик» билан ўйинда ушбу бразилиялик жамоага ёрдам бера олмайди.
Иккинчи бўлимда эса жамоалар футболдан кўра кураш намойиш этишди: 15 дақиқа давомида жамоалар жуда кўп фол ишлатишди ва кутилган гол кўрсаткичи бўйича жами 0,01 xG қайд этишди. Шундан кейин «Реал» ўйинда фаворит кимлигини эслаб қолиб, уч тақиқада икки гол урди.
Аввалига Лунин тўпни узоқлаштиргач, Валверде ҳаводаги курашда устун келди ва тўпни олдинга ташлади, бу тўпга етиб борган Браим яккама-якка вазиятдан фойдаланди. Кейин Рюдигер яна ўзини плеймейкер сифатида намоён этиб, тўпни чап қанотга ошириб берди. Валверде эса рақиб жарима майдонига ёриб кирган Винисиусни тўп билан таъминлади ва у бу сафар Эррерани доғда қолдирди.
«Осасуна» иккинчи бўлимда 90+1-дақиқага қадар умуман ҳеч қандай вазият ярата олмади: қўшиб берилган дақиқаларда эса Мунос ҳисобни биттага қисқартирди. «Реал» эса яна гол уриши мумкин эди: Винисиус ҳет-трикка яқин эди, Эррера Родриго билан дуэлда устун келди, Модричнинг хавфли узатмасини бартараф этди, Гулер Эррера олдинга чиқиб кетганини кўриб, майдон марказидан шедевр гол уриши мумкин эди, аммо унинг зарбаси тўсинга тегди.
Буни мадридликлар ва дисквалификацияси бўлмаганда Вини учун ҳам идеал ўйин дейиш мумкин эди. «Атлетик»ка қарши ўйинда Беллингҳем сафга қайтади, шунга қарамай, курашувчан баскларга қарши ўйинда бразилиялик футболчининг йўқлиги сезилиши мумкин.
«Жирона» «Хетафе»га мағлубиятга учради (қаторасига тўртинчи сафар ўйинида) ва энди «Реал»дан 10 очкога ортда қолмоқда. Қолаверса, бу турда «Барселона» «Атлетико»ни мағлубиятга учратса, иккинчи ўринга чиқиб олиши мумкин.
«Жирона» «Хетафе» билан ўйинга Циганков – Довбик тандемини тушира олмади. Яримҳимоячи жароҳат олган ва ўйин қайдномасига киритилмади. Таркибдаги бошқа муаммолар каталонияликлар бош мураббийи Мичелни чап қанот ҳимоясига Блиндни қўйишга мажбур қилди. Жамоада ҳужум чизиғи ҳам кучсизланганди ва ҳисоб 0:0 ҳолатида меҳмонлар ҳужумга ўтишга ошиқишмади.
«Жирона» марказий ҳужумчиси Добвикка етарлича узатмалар бўлмади, дастлабки 40 дақиқа давомида у атиги саккиз бор тўп билан учрашди, шундан фақат биттаси рақиб жарима майдони ичида. Ўйинда меҳмонлар зарарига баҳсли ҳолатлар ҳам кузатилди, Артём Добвикнинг узатмасидан кейин Порту яккама-якка вазиятга чиқиб кетаётганди, амо Алдерете унинг футболкасидан тортиб қолди. Ҳакам Мунуэра Монтеро сариқ карточка кўрсатди, видеоассистентлар уни қизил эҳтимолини кўриб чиқиш учун VAR мониторига чақиришди, аммо рефери ўз қарорини ўзгартирмади. Кейин мезбонлар ҳимоячиси Жене тўпни жарима майдонидан узоқлаштиришда тойиб кетиб, Довбикнинг оёғига бориб урилди. Аммо ҳакам бу зарба у қадар кучли бўлмагани ва фолга тортмаслигини билдирди.
Ўйинда дарвоза соҳасига борган илк зарба ўйиннинг ярим соати ортда қолганида рўй берди. Бу зарба «Хетафе» томонидан йўлланди ва ҳисоб очилди. Ўнг қанотда Морибадан тўпни қабул қилган Сантяго икки тегинишдан кейин тўпни узоқ бурчакка аниқ йўллади.
Бўлим охирида Довбик икки қулай вазиятга эга бўлди, аммо аниқ зарба бера олмади. Танаффусдан кейин «Хетафе» тўпни назорат қилди ва рақибга ҳужум қилишга имкон бермади. Фақат бўлимнинг иккинчи қисмига ўтиб «Жирона» майдоннинг иккинчи қисмида фаоллашди. Довбик яна икки қулай вазиятга эга бўлди. Биринчи эпизодда у икки ҳимоячидан қочиб кетиб, жамоасининг ўйин бошидан буён дарвоза соҳасига борган илк зарбасига муаллифлик қилди – аммо ерлатиб берилган зарба дарвозабонга қийинчилик туғдирмади. Кейин каталонияликлар чиройли комбинация уюштиришди ва Савио тўпни қулай вазията турган Артёмга етказиб берди. Аммо у яна вазиятдан фойдалана олмади.
«Жирона» 85-дақиқада жавоб голини уриш учун сўнгги имкониятини ҳам йўққа чиқарди, кросс узатма учун ҳаводаги курашда устун келган Довбик бош билан зарба берди, яна муваффақиятсиз. Ўйинга қўшиб берлиган етти дақиқа давомида «Хетафе» рақибга ҳужум қилишга имкон бермади. Зарбалар статистикаси бўйича амалда дуранг – 11:12 (дарвоза соҳасига аниқ борган зарбалар – 3:3), аммо Хосе Бордаласа жамоаси ғалабага эришди.
«Бавария» Дармштадтда ҳисобда ортда қувишига тўғри келди ва яна Кейн ўйинда бурилиш ясади. Аввалига Ҳарри Мусиалага ҳисобни тенглаштиришда ёрдам берди. Кейин — йиқилаётган ҳолатда бош билан ажойиб зарба берди, бу вазиятда финтлар билан ҳимоячиларни шошириб қўйган ва тўп майдонни тарк этишига йўл қўймаган Киммиҳ ҳам ажойиб ҳаракат қилди. Мезбонлар яна вазиятни тенглаштиришга жуда яқин келди ва бу эпизодда мюнхенликларни дарвоза устуни голдан сақлаб қолди, аммо шундан кейин ўйин Томас Тухел сценарийси бўйича кечди. Иккинчи бўлимда Мусиала яна бир гол урди ва Гнабрига пас берди. Узоқ даволанишдан кейин сафга қайтган ушбу футболчи қаторасига иккинчи турда гол урмоқда. Аммо барчаси меҳмонлар учун идеал якунланмади, ўйин охирида дарвоза устунига бориб урилган Кейн жароҳат олиб алмаштирилди. Лекин у майдонни янги рекорд билан тарк этди, бунгача бундеслигада ҳеч ким илк мавсумидаёқ 31 гол урмаган.
«Байер» ва «Бавария» биринчи ва иккинчи ўринларни ҳеч кимга бериб қўймаслиги тайин, «Штутгарт» ҳам учинчи ўринда ўзини анча ишончли ҳис қилмоқда. Қолаверса, Африка кубогидан қайтганидан кейин жароҳатидан тузалган Гирасси юқори спорт формасида. «Ҳоффенҳайм» майдонида ҳам шваблар мергани чиройли финт билан биринчи голли ҳужумга ҳисса қўшди, бу ҳужум якунида Ундав Мийони зарба бериш ҳолатига чиқарди. Танаффус арафасида эса Гирасси жарима майдони ичига кесиб узатилган пасни голга айлантирди. Гвинеялик ҳужумчига ҳам Ундав ассистентлик қилди, ушбу жуфтлик чемпионатда биргаликда 36 гол уришган. Бу Элбер — Бобич тандемининг такрорланиши бўлди, Юрген Клинсманн ва Карл Аллгевернинг клуб рекордига етишга эса бир гол қолди.
Кун статистикаси
«Ковентри» ўз тарихида 2-бор Англия Кубоги яримфиналига чиқди. Ўтган сафар бу 1986/87 йиллар мавсумида қайд этилган ва ўшанда жамоа совринни ўзиники қилганди.
«Торино» форварди Сапата А сериянинг сўнгги саккиз мавсумидан 7 тасида голлари сонини ўндан оширмоқда. Бундай кўрсаткичга фақат «Лацио» ҳужумчиси Иммобиле эришганди.
Жоселен Гурвеннек «Нант» бош мураббийлигидаги дастлабки 15 ўйинидан 10 тасида мағлубиятга учради. Бунгача ҳеч бир мураббий бундай қисқа вақт ичида бундай ёмон натижа қайд этмаганди.
«Торино» Италия чемпионатининг 29 турида 14 ўйинда ўз жамоаси дарвозаси дахлсизлигини сақлаб қолди, жамоада бундай натижа 1991/92 йиллар мавсумидан буён кузатилмаганди.
«Аугсбург» ҳисобда ортда бораётган ўйинларида вазиятни ўзгартириш орқали жами 23 очко тўплади. Шундай ўйинларда яна олти очко ишланса «Байер»нинг 1999/00 йиллар мавсумидаги (29 иродали очко) рекорди такрорланади.
