Ўзбекистонда бинолар қурилишида замонавий телекоммуникация инфратузилмаси мажбурий бўлади

Сенатнинг эллик биринчи ялпи мажлисида сенаторлар томонидан “Телекоммуникациялар тўғрисида”ги қонуннинг янги таҳрири муҳокама қилинди.

Қайд этилишича, амалдаги “Телекоммуникациялар тўғрисида”ги қонун 1999 йилда қабул қилинган бўлиб, унда назарда тутилган бир қатор қоидалар эскирган ва бугунги кун талабларига тўлиқ жавоб бермайди. Жумладан, мавжуд тартибга солиш механизмлари ва атамалар ўз аҳамиятини йўқотганлиги сабабли амалиётда нотўғри талқин қилиш ҳолатлари ва соҳанинг ривожланишига тўсиқлар пайдо бўлмоқда.

Янги таҳрирдаги “Телекоммуникациялар тўғрисида”ги қонун билан эса аҳолига ва телекоммуникация соҳасида фаолият юритувчи субъектларга бир қатор қулайликлар яратилмоқда.

Таъкидланишича, бугунги кунда янги қурилган кўп қаватли уйларнинг айримларида тегишли инфратузилма кўзда тутилмагани сабабли қайта қурилиш ишларини олиб боришга тўғри келмоқда. Ушбу оворагарчиликларнинг олдини олиш мақсадида бундан кейин бино ва иншоотлар қурилишида замонавий телекоммуникация инфратузилмаси мажбурий бўлади.

Хусусан, кўп қаватли уйларда яшовчиларнинг аризаси бўлганда хизмат кўрсатувчи тадбиркорлик субъектларига бинода мавжуд инфратузилмадан беғараз фойдаланиш имконияти яратилади. Операторларга телекоммуникация инфратузилмаси объектларидан биргаликда фойдаланишга рухсат берилади.

Бундан ташқари, қонун билан телекоммуникация соҳасида фаолият юритувчи субъектларга бир қатор қулайликлар яратилмоқда. Қонунга кўра энди банк, тўлов тизими, тўлов ташкилоти, электрон тижорат платформаси иловалари орқали хизматларни кўрсатишда телекоммуникациялар соҳасида фаолият юритиш учун лицензия талаб этилмайди.

Қонун сенаторлар томонидан маъқулланди.