Чехия ТИВ раҳбари DW нашрига берган интервюсида Европа Иттифоқи ва НАТО Россияга нисбатан стратегия, жумладан, Украинадаги урушни тугатиш бўйича муҳокамага муҳтож. Ян Липавский ҳозир бундай стратегия йўқлигини хато деб ҳисоблайди.
Шимолий Атлантика алянси ҳам, Европа Иттифоқи ҳам Россия Федерациясига нисбатан стратегияга эга эмас, деди Чехия ташқи ишлар вазири Ян Липавский 3 апрел, чоршанба куни Брюсселда DW мухбири билан суҳбатда. «На НАТОда, на Европа Иттифоқида бизнинг Россияга нисбатан стратегиямиз ҳақида умумий баҳс-мунозара йўқ. Менимча, бу хато. Бизда шундай дебат бўлиши керак, деб ўйлайман. Бундай муҳокамада Украинадаги уруш қандай тугаши кераклигини ҳам муҳокама қилишимиз керак», - деб таъкидлади у.
«Бизда бундай ҳақиқий стратегия йўқлиги сабабли, мавжуд бўлган тамойилларга амал қилишимиз керак», деди вазир Украинанинг халқаро чегараларидаги суверенитети ва ҳудудий яхлитлиги тамойилларини, 1991 йил Будапешт меморандумини санаб ўтиб. У Украина давлати ва халқи Россия билан келажакда тинчлик ўрнатиш тўғрисида қарор қабул қилишда овоз бериш ҳуқуқига эга бўлиши керак бўлган принципни алоҳида таъкидлади.
«Биз, Ғарб ёки йирик давлатларнинг энг катта хатоси, Украинани жараёнда иштирок этишга таклиф қилмасдан туриб, унга ечимни мажбурлаш бўлади. Улар ўзларини хиёнатда қолгандек ҳис қилади, бу Европада барқарор ва адолатли тинчлик ва хавфсизликка олиб келмайди», - дейди Ян Липавский.
Музлатилган можаро Европага тинчлик келтирмайди
Германия Социал-демократик партияси парламент фракцияси раиси Ролф Мютцених томонидан қайта-қайта айтилган ҳолат - Украинадаги можарони музлатиш таклифи ҳақидаги саволга Липавский шундай жавоб берди: «Можарони музлатиш ҳақида эшитганимдан хурсанд эмасман, чунки Украинада можаро 2014 йилдан бери музлатилган ва ҳозирги уруш шунчаки 2014 йилда бошланган музлатилган можаронинг давоми. Демак, менинг фикримча, бу Европа қитъасида адолатли ва мустаҳкам тинчликка олиб келмайди».
Унинг фикрича, Украинадаги уруш бундан ҳам каттароқ муаммо - Россия империализмининг оқибати. «Асл муаммо шундаки, Кремл раҳбари куч билан ҳудуднинг бир қисмини эгаллаб: «Бу меники», деб эълон қилиши мумкин», - дейди вазир. У Москванинг Қрим, Гуржистон, Днестрбўйидаги хатти-ҳаракатларини эслатиб, Россия пропагандаси аллақачон Болтиқбўйи мамлакатлари, Полша ва ҳатто Чехияни нишонга олганини таъкидлади: «Шунинг учун Европа, ЕИ, Чехияни ҳимоя қилишимиз керак, шунчаки музлатишга интилиш ҳам хавфсизликка олиб келмайди. Лекин мен ҳеч қандай сценарийни истисно қилмайман, албатта, кўп нарса бўлиши мумкин», — дея қўшимча қилди у.
