Германияда Марказий Осиёдан келган етти кишига нисбатан айблов эълон қилинди

2022 йил баҳорида Украинадан Германияга келган Тожикистон, Қирғизистон ва Туркманистоннинг етти нафар фуқароси террорчилик ташкилоти тузишда айбланмоқда.

Фото: Fabrizio Bensch / Reuters

Марказий Осиёдан келган 7 нафар фуқаро ҳибсга олинганидан тўққиз ой ўтиб, уларга айблов эълон қилинди. Улар Германияда террорчилик гуруҳи тузган ва терактлар режалаштирган, дея маълум қилди Карлсруэ федерал прокуратураси 24 апрел, чоршанба куни Дюсселдорфдаги олий минтақавий судда уларга айблов қўйиб. Катта эҳтимол билан, айбланувчилар яқин орада судга олиб келинади.

Марказий Осиёдан келганлар хориждагилар учун пул йиғган

Етти кишидан олти нафари Германия ичида террорчилик гуруҳини тузиш, шунингдек, ИШИД террорчилик ташкилотини қўллаб-қувватлашда айбланмоқда. Бундан ташқари, ҳибсга олинган беш киши Германия ташқи савдо қонунини бузгани бўйича гумон қилинмоқда. Прокуратура маълумотларига кўра, улар ИШИД учун пул йиғиб, хориждагиларга бир неча минг евро ўтказган.

2023 йил июл ойида Шимолий Рейн-Вестфалия федерал штатида беш нафар Тожикистон, бир нафар Қирғизистон ва бир нафар Туркманистон фуқароси қўлга олинган ва ўшандан бери ҳибсда сақланмоқда. Ҳибсга олинган пайтда улар 20 ёшдан 46 ёшгача бўлган.

Марказий осиёлик муҳожирлар Германияга Украинадан келган

Прокуратура маълумотларига кўра, айбланувчилар бир-бирини узоқ вақтдан бери таниган ва радикал қарашларга эга бўлган. 2022 йил баҳорида Россиянинг Украинага ҳужуми бошланганидан кўп ўтмай, улар «деярли бир вақтнинг ўзида» бу мамлакатдан Германияга жўнаб кетган ва у ерда ҳозирда Нидерландияда суд қилинаётган бошқа гумондорга қўшилган. Улар Германия ва бошқа Ғарбий Европа давлатларида терактлар содир этилиши мумкин бўлган жойларни ўрганган, дея таъкидлайди департамент.

Бу гуруҳ аъзолари ИШИДнинг Афғонистон бўлими вакиллари билан алоқада бўлган. Шунингдек, улар ҳужумларни амалга ошириш учун пул ва қурол топишга ҳаракат қилган. Шу билан бирга, ҳибсга олинган пайтда улар ҳали «ҳужумнинг аниқ режаси»га эга эмас эди, дея маълум қилди Карлсруэдаги маҳкама.

ИШИДнинг Афғонистон бўлими, жумладан, Москва вилоятидаги «Крокус Сити Холл» концерт залига уюштирилган ва 130 дан ортиқ одамнинг ҳаётига зомин бўлган ҳужум учун жавобгарликни ўз зиммасига олди. Германия хавфсизлик идораларига кўра, ҳозирда бу гуруҳ ҳужумлар учун энг катта хавф туғдирмоқда. Кёлн ва Венада терактларни режалаштиришда гумон қилинган ва шу йил бошида ушланган бир қанча гумонланувчилар ҳам ушбу гуруҳга алоқадор бўлган.