Байден АҚШ университетлари кампусидаги зўравонликни қоралади

Американинг ўнлаб университетлари ҳудудида Фаластин тарафдорлари норозилик намойишлари бўлиб ўтмоқда. АҚШ президенти Байден ушбу намойишлардаги зўравонликни кескин қоралаб, фуқароларнинг тартибсизлик яратишга ҳаққи йўқлигини таъкидлади.

Фото: Mario Tama/AFP/Getty Images

АҚШ президенти Жо Байден яна бир нуфузли университет ҳудудидаги Фаластин тарафдорлари лагери демонтаж қилингандан сўнг, намойишлар чоғидаги зўравонликларни кескин қоралади. У 2 май, пайшанба куни Оқ уйда бўлиб ўтган брифингда Исроилнинг Ғазо секторидаги ҳарбий амалиётига қарши Америка университетларида ўтказилаётган норозиликларни изоҳлар экан: «Фуқаролар норозилик билдириш ҳуқуқига эга, лекин тартибсизлик яратишга ҳақли эмас», деди.

Байденнинг сўзларига кўра, Қўшма Штатлар - «норозилик овозлари» ўчириладиган авторитар мамлакат эмас, балки «тартиб ҳукмрон бўлиши керак бўлган фуқаролик жамияти». Талабалар кампусларидаги намойишчилар ўз фикрларини эркин билдириш ҳуқуқига эга, лекин қонунни бузмаслиги ёки зўравонлик қилмаслиги керак, дея қўшимча қилди у.

«Зўравонлик содир бўлганда, бу ноқонунийдир. Мулкни йўқ қилиш тинч намойиш эмас. Бу қонунга зиддир. Вандализм, босқинчилик, деразаларни синдириш, кампусларни ёпиш, дарсларни бекор қилиш - буларнинг ҳеч бири тинч намойиш эмас», - дея таъкидлади Америка президенти.

Байден: Америкада антисемитизм ва исломофобия учун жой йўқ

Жо Байденнинг айтишича, «Америкада антисемитизм ёки яҳудий талабаларга нисбатан зўравонлик таҳдиди, исломофобия ёки араб ва фаластинлик америкаликларга нисбатан камситиш учун жой йўқ». Шу билан бирга, президент кампуслардаги норозилик намойишлари уни Исроил ва Яқин Шарққа нисбатан сиёсатини қайта кўриб чиқишга мажбурламаганини таъкидлади.

Апрел ойи ўрталаридан бери Американинг ўнлаб университетлари ҳудудларида Фаластин тарафдорлари норозилик намойишлари бўлиб ўтмоқда. Намойишлар Лос-Анжелесдаги Калифорния университети, Техас университети, Чапел Хиллдаги Шимолий Каролина университети, Ню-Йоркдаги Колумбия университети ва бошқаларни қамраб олди. Талабалар АҚШдан Исроил билан барча молиявий алоқалардан воз кечишни ва Исроилнинг Ғазо секторидаги ҳарбий амалиётини қўллаб-қувватлашни тўхтатишни талаб қилиб, кампусларда чодирлар қурди. Уч ҳафта мобайнида АҚШ коллежлари ва университетлари кампусларида 1500 дан ортиқ киши қўлга олинган.

29 апрель куни намойишчилар Колумбия университети кампусидаги асосий бинолардан бири бўлган, асосан маъмурий офислар жойлашган Ҳамилтон-ҳоллни эгаллаб, тўсиб қўйди. Фаоллар босиб олинган бинода тахминан 12 соат туришга муваффақ бўлди, шундан сўнг полиция рейд ўтказиб, уни озод қилди. 300 га яқин киши ушланган.