83 ёшли фуқародан невараси ЙТҲга учраганини айтиб, 3 минг доллар олиб кетган шахс ушланди 

Бухоро вилоятида яшовчи 83 ёшли Д.Н. ариза билан мурожаат қилиб, 3000 АҚШ доллари номаълум шахс томонидан фирибгарлик йўли билан ўзлаштирилганлигини маълум қилган.

Тезкор-қидирув хизмати Киберхавфсизлик бўлинмалари ходимлари томонидан ўтказилган тезкор-қидирув тадбирлари натижасида, мазкур жиноятни Бухоро вилоятида яшовчи аёл С.С. содир этганлиги аниқланган.

Гумонланувчи сифатида тергов органларига жалб этилган аёл С.С., жабрланувчи Д.Н.га қўнғироқ қилиб, унинг невараси йўл-транспорт ҳодисасига учраганлиги ва зудлик билан пул кераклигини айтиб уни алдаб, яшаш уйига келиб 3000 АҚШ доллар пулларини олиб кетганлиги маълум бўлди.

Мазкур ҳолат юзасидан С.С.га нисбатан Жиноят кодексининг 168-моддаси 2-қисми билан жиноят иши қўзғатилган.

Қонунга мувофиқ, ЖКнинг 168-моддаси 2-қисмидаги жиноий хатти-ҳаракатлар учун 3 йилдан 5 йилгача озодликдан маҳрум қилиш жазоси назарда тутилган.