90 та давлат ва ташкилот тинчлик саммитида иштирок этишини тасдиқлади

Июн ойи ўрталарида Швейцарияда бўлиб ўтадиган Украина бўйича тинчлик саммитига 90 мамлакат ва ташкилот рўйхатдан ўтказилди. Бу ҳақда 10 июн, душанба куни Берндаги ҳукумат маълум қилди.

Швейцария президенти Виола Амҳерднинг аниқлик киритишича, анжуманда қатнашишини расман тасдиқлаган 80 та делегация дунёнинг барча минтақаларидаги давлатлар ва 10 та турли халқаро ташкилотлар, жумладан, БМТ вакилларидан иборат. Аввалроқ Украина президенти девони 107 давлат вакиллари Швейцария саммитида иштирок этишини тасдиқлагани ҳақида хабар берган эди.

«Саммитда иштирок этадиган барча давлатлар Украинада адолатли ва мустаҳкам тинчликка эришиш бўйича ўз ғоялари ва қарашларини билдиришлари керак», - дея таъкидлади Швейцария ТИВ. Мамлакат президенти ушбу учрашувни барқарор тинчлик сари биринчи қадам сифатида баҳолади.

Россия таклиф қилинмади, аммо саммитдан мақсад - келажакда тинчлик музокаралари учун шароит яратиш

Россия йиғилишга таклиф қилинмади, аммо Швейцария ҳукумати таъкидлаганидек, конференциянинг мақсади «биргаликда йўл харитасини ишлаб чиқиш» бўлиб, у Россия ва Украинани тинчлик жараёнига янада жалб қилиш имконини беради.

Россиянинг саммитга келмаслиги Хитой каби Москванинг нуфузли иттифоқчилари конференциядан воз кечишига туртки бўлди. Бу музокараларда катта ютуқларга эришиш умидларини пасайтиради.

Шу билан бирга, Швейцария ташқи ишлар вазири Игнацио Кассиснинг сўзларига кўра, учрашувда ядровий ва озиқ-овқат хавфсизлиги, навигация эркинлиги, шунингдек, гуманитар, жумладан, ҳарбий асирлар билан боғлиқ масалалар ҳам муҳокама қилинади.

Иштирокчилар орасида - Ҳаррис, Макрон ва Шолц

Украина бўйича глобал тинчлик саммити 15-16 июн кунлари Люцерн шаҳри яқинидаги Бюргеншток тоғли курортида бўлиб ўтади. Учрашув иштирокчилари орасида Украина президенти Володимир Зеленский, Франция президенти Эммануэл Макрон, АҚШ вице-президенти Камала Харрис, Германия канцлери Олаф Шолц ва Япония бош вазири Фумио Кишида бор.