Россиядан хорижликларни чиқариб юборишнинг янги тартиби жорий этилиши мумкин 

МДҲ ишлари бўйича Россия Давлат Думаси қўмитаси миграция соҳасида давлат назоратини кучайтириш, хусусан, янги депортация режимини жорий этиш тўғрисидаги қонун лойиҳасини тақдим қилди. Бу ҳақда Interfax хабар берди. 

Қонун лойиҳасида айтилишича, депортациянинг янги тартиби Россияда қонуний бўлиш ҳуқуқига эга бўлмаган хорижий фуқароларга нисбатан ўрнатилади. 

Бунинг сабаби Россияда вақтинча бўлиш ёки миграция ҳужжатларининг муддати тугаши, вақтинчалик яшаш учун рухсатноманинг бекор қилиниши, яшаш учун рухсатнома ёки ноқонуний хатти-ҳаракат содир этилиши бўлиши мумкин. 

Чет эл фуқароси Россиядан чиқиб кетганда, ушбу режимни қўллаш учун асос бўлган қарор бекор қилинганда ёки чет эл фуқароси вафот этган ҳолларда депортация режими тугатилади. 

Бундай режимни жорий этилиши Россияда ноқонуний бўлган чет эл фуқаросининг муайян ҳуқуқларини чеклашни назарда тутади. 

Бундай чекловлар сифатида қуйидаги тақиқлар кўзда тутилган:

- ички ишлар органининг рухсатисиз Россияда яшаш ёки вақтинчалик бўлиб туриш жойини ўзгартириш;

- Россияда яшаб турган жойидан ташқарига саёҳат қилиш;

- автомобил бошқариш, ҳайдовчилик гувоҳномаси олиш;

- кўчмас мулк, автомобилга эга бўлиш ва уларни рўйхатдан ўтказиш;

- никоҳдан ўтиш;

- юридик шахс, тадбиркор сифатида рўйхатдан ўтиш;

- кредит расмийлаштириш, банк ҳисоби очиш, пул ўтказмаларини амалга ошириш. 

Шу билан бирга Россиядан чиқариб юборилиши керак бўлган шахс Назорат остидагилар реестрига киритилиши ҳам белгиланган. Ҳуқуқ-тартибот органлари ходимлари бундай шахслар жойлашган ҳудуд ёки бинога кириш ҳуқуқига ҳам эга бўлади.