Осло Украина энергетика соҳасини қўллаб-қувватлаш учун 100 млн евро ажратади

Маблағларнинг бир қисми Харкив вилоятида электр таъминотини тиклаш учун сарфланади, дея маълум қилди Норвегия. Бош вазир Йонас Гар Стёре Россия Федерацияси Украина энергетика қувватининг ярмини йўқ қилганини эслатди.

Фото: AP / Evgeniy Maloletka

Норвегия ҳукумати Украинанинг энергетика инфратузилмасини қўллаб-қувватлаш учун 1,1 миллиард крона (96 миллион евродан ортиқроқ) маблағ ажратади. «Россия электр тармоқларини фалаж қилиш учун кенг кўламли, тизимли ҳужумларни амалга оширмоқда, бироқ украиналиклар аҳоли учун зарур электр таъминотини таъминлаш мақсадида кеча-ю кундуз ишламоқда», — деди Норвегия бош вазири Йонас Гар Стёре 16 июн, якшанба куни.

Норвегия ҳукумати баёнотида таъкидланишича, Россия Федерацияси Украинанинг электр станциялари ва бошқа муҳим инфратузилмаларини бомбардимон қилиш орқали унинг чидамлилигини сусайтирмоқчи бўлиб, қўшни давлат энергия салоҳияти 50 фоиздан ортиғини йўқ қилган.

Маблағларни сарфлаш масаласида Украина билан мулоқот

Стёре сўзларига кўра, унинг ҳукумати тақдим этилган маблағлардан энг самарали фойдаланиш масаласида Киев билан яқиндан мулоқот қилмоқда. «Украиналикларнинг ўзи нима кераклигини яхши тушунади, аммо қишдан олдин инфратузилмани тиклаш бўйича ишларни бошлаш жуда муҳим, Норвегия янги молиявий ёрдами Украинадаги зарарни қисман юмшатади ва электр таъминотини кафолатлайди», деб таъкидлади у.

Маблағлар бир қисми БМТ Тараққиёт дастури орқали Харкив вилоятидаги энергетика инфратузилмасини таъмирлашга, туғуруқхоналар ва еттита шифохонанинг операция хоналарида барқарор электр таъминотига йўналтирилиши кутилмоқда.

Украинани тиклаш бўйича учинчи конференция

11-12 июн кунлари Берлинда Украина президенти Володимир Зеленский, Германия канцлери Олаф Шолц, шунингдек, 60 та давлатдан яна икки мингга яқин иштирокчи – сиёсатчилар, халқаро ташкилотлар вакиллари, бизнес вакиллари иштирокида Украинани тиклаш бўйича конференция бўлиб ўтди.

Конференция давомида Украинани тиклаш бўйича лойиҳаларни молиялаштиришга оид 100 дан ортиқ шартномалар тузилди. Жаҳон банки маълумотларига кўра, Россия Федерациясининг ҳарбий тажовузидан Украинага етказилган зарар камида 486 миллиард долларни ташкил этади. Шунга ўхшаш конференциялар 2022 йилда Швейцариянинг Лугано шаҳрида ва 2023 йилда Лондонда бўлиб ўтди.