Бухородаги боғчада болалардан бирининг отаси бошқа болага жароҳат етказди

Ижтимоий тармоқларда боғчада болага жароҳат етказилгани айтилаётган видео тарқалди. Болалар омбудсмани ҳолат юзасидан терговга қадар текширув ўтказилаётгани ҳақида хабар берди.

Маълум бўлишича, 2024 йил 24 июн куни Бухоро вилояти Олот тумани тиббиёт бирлашмаси навбатчи шифокори ИИБга хабар бериб, боғча тарбияланувчиси, 2019 йилда туғилган А.Ю. тан жароҳати билан олиб келинганини билдирган.

Ўтказилаётган терговга қадар текширув жараёнида аниқланишича, 24 июн куни мазкур боғчада бўлган А.Ю. 2019 йилда туғилган бошқа бола А.С. билан уришган. Шундан сўнг А.С.нинг отаси келиб А.Ю.нинг юзига уриб, жароҳат етказган.

Қайд этилишича, ҳозирда болага етказилган жароҳат даражасини аниқлаш юзасидан суд-тиббий экспертиза тайинланган.

“Мазкур ҳолат юзасидан терговга қадар текширув давом этмоқда. Бу борада қўшимча маълумот берилади”, дейилади хабарда.

Аввалроқ, Самарқанд вилояти Тойлоқ тумани Сочак қишлоғида яшовчи эркак 6 ёшли ўгай ўғлини камар билан савалаганди.