Тинтувдан сўнг йўқолган тиллалар – қидирувдаги собиқ терговчи ишида янги тафсилотлар пайдо бўлди  

Лочинбек Тошпўлатов ким?

Лочинбек Тошпўлатов 2020 йилдан 2025 йил 19 июлга қадар Бухоро шаҳар ИИБ терговчиси, 2025 йил 19 июлдан 9 сентбяргача Пешку тумани ИИБ профилактика инспектори, 9 сентябрдан 30 декабрга қадар эса Ромитан тумани ИИБ профилактика инспектори лавозимида ишлаган. Бухоро вилояти ИИБ томонидан ўтказилган хизмат текширувига кўра ички ишлар ходими шаънига путур етказувчи ҳаракатлар содир этгани сабаби билан 2025 йил 30 декабрда хизматдан бўшатилган.

У айни пайтда “йўқолиб қолган”: унга нисбатан жиноят иши қўзғатилиб, қидирувга берилган. Kun.uz аввалроқ Лочинбек Тошпўлатов Бухоро шаҳрида кўп қаватли турар жой мажмуаси қуриб сотувчи қурилиш фирмасига нисбатан олиб борилган терговда далилларни сохталаштирган бўлиши мумкинлиги ҳақида ёзганди.

Лочинбек Тошпўлатов ўзига нисбатан ноҳақлик бўлаётгани, бу ишлар ортида вилоят прокурорининг ўринбосари Алиакбар Пўлатов ва вилоят прокуратураси тергов бўлими бошлиғи Отабек Музаффаров турганини айтган. 

Лочинбек Тошпўлатовнинг қидирувга берилгани Kun.uz’нинг “Best building company” МЧЖ билан боғлиқ суриштирувидан сўнг аниқ бўлганди. Ушбу МЧЖнинг илк таъсисчиси Умиджон Нуруллаев айнан Лочинбек Тошпўлатовнинг ғайриқонуний тергови натижасида ноҳақ айбланганини айтган.

Йўқолган тақинчоқлар

Бош прокуратура Kun.uz’га Лочинбек Тошпўлатов ва бошқаларга нисбатан қўзғатилиб, ҳозирда тергови давом этаётган жиноят иши тафсилотлари ҳақида маълумот берди.

Унга кўра, Лочинбек Тошпўлатовга нисбатан 2025 йил 29 декабрда Бухоро шаҳар прокуратураси томонидан Жиноят кодексининг 207-моддаси (Мансабга совуққонлик билан қараш) 1-қисми билан жиноят иши қўзғатилган.

Қайд этилишича, фуқаро Бобур Раупов ва бошқаларга нисбатан Жиноят кодексининг 168-моддаси 4-кисми (жуда кўп миқдорда фирибгарлик) ва бошқа моддалари билан қўзғатилган жиноят иши Лочинбек Тошпўлатов иш юритувида бўлган. 2024 йил 24 апрелда ушбу жиноят иши бўйича фуқаро Р.Ш.нинг Бухоро шаҳридаги уйида тинтув ўтказилган. Лочинбек Тошпўлатов тинтув жараёнида баённомага асосан олинган 1 жуфт тилла сирға, 1 дона тилла узук, 5 дона банк пластик карталари, 3 дона флешка хотирасини белгиланган тартибда сақлаш учун топширмаган. Оқибатда уларнинг йўқолишига сабабчи бўлган.

Шунингдек, Лочинбек Тошпўлатов фуқаро У.Н.нинг Бухоро шаҳридаги яшаш уйида ўтказилган тинтувда баённомага асосан олинган, У.Н.нинг келинига тегишли жами қиймати 10 минг долларлик 2 дона тилла занжир, 3 дона тилла

кулон, 1 дона тилла браслет, 7 дона аёллар тилла узуклари, 1 дона аёллар кумуш узугини белгиланган тартибда сақлаш учун топширмаган. Оқибатда бу тилла тақинчоқлар ҳам йўқолган. 

Терговчининг уйида тинтув

Қўзғатилган жиноят иши бўйича 2025 йил 30 декабрда Лочинбек Тошпўлатовнинг Вобкент туманидаги хонадонида тинтув ўтказилган. Жараёнда фуқаро Р.Ш. ва И.М.га тегишли банк пластик карталари топилган. Бу банк карталари Б.Р. ва бошқаларга нисбатан қўзғатилган жиноят иши бўйича Лочинбек Тошпўлатов томонидан ўтказилган тинтувда далилий ашё сифати олинган бўлган. 

“Дело” шаҳардан вилоятга ўтган

Жиноят иши дастлаб Бухоро шаҳар, 2026 йил 27 январда вилоят прокуратураси ўта оғир жиноятларни тергов қилиш бўлими томонидан иш юритувга олинган.

2026 йил 30 мартда Бухоро шаҳар ИИБ собиқ терговчиси Лочинбек Тошпўлатов ва 1 апрелда тергов бўлинмаси собиқ бошлиғи Х. Яхшиев ишда гумон қилинувчи тариқасида жалб қилинган.

Ука ўрнига ака 

Дастлабки терговда “дело”га Лочинбек Тошпўлатовнинг жиноят иши қўзғатишни рад қилиш ҳақида 2025 йил 20 февралдаги қарори бекор қилинган ҳолда қўшилган. Бу қандай қарор эди?   

Иш ҳужжатларига кўра, фуқаро Б.Б. 2025 йил 10 феврал куни тунда “102” рақамига қўнғироқ қилиб, Бухоро шаҳри, С.Айний кўчасидаги хонадонда “одам пичоқлаганини”ни билдирган.

Аниқланишича, Вобкент туман ИИБ профилактика инспектори Ш.Иззатуллоев ўзининг олдиндан таниши бўлган Г.Б. билан ишқий муносабатларга киришиб, у билан 2025 йил 10 феврал куни тунда яшаш уйида кўришган. Шу пайтда Г.Б.нинг турмуш ўртоғи Б.Б. ушбу ҳолатни сезиб қолиб, Ш.Иззатуллоев билан ўзаро жанжаллашган ҳамда ошхона пичоғи билан унинг чап томон кўкрак қафасига бир марта урган. Сўнг ҳолат ҳақида “102” рақамига қўнғироқ қилиб, хабар берган.

Бироқ, Ш.Иззатуллоев ўз ҳаракати фош бўлса, ички ишлар органлари ходими сифатидаги обрўсига путур етиб, интизомий жазо қўлланишининг олдини олиш мақсадида Лочинбек Тошпўлатов билан келишган. Яъни, Ш.Иззатуллоев акаси Д.И.ни жалб қилиб, гўёки бўлиб ўтган ишлар ўзи эмас, акаси билан содир бўлгани ҳақида ҳужжатлар қилишган.

Лочинбек Тошпўлатов шериклари Ш.Иззатуллоев, унинг акаси Д.И., ҳудуд профилактика инспектори А.Акрамов ва қариндоши О.Ҳ. билан ўзаро тил бириктириб, ҳодиса содир бўлган жойни кўздан кечириш баённомасига аниқланган қон доғлари, қонга ўхшаш доғлари бўлган кийимлар ва пичоқни қайд этмаган. Шунингдек, Г.Б. ва Д.И.ни суд тиббий экспертиза текширувидан ўтказмасдан, ҳолат бўйича жиноят иши қўзғатишни рад этиш ҳақида қарор қабул қилган.

Собиқ терговчи қидирувда

2026 йил 29 апрелда Лочинбек Тошпўлатов, Вобкент туман ИИБ ХПБ профилактика инспектори Ш.Иззатуллоев, Бухоро шаҳар ИИО ФМБ 2-сонли ИИБ ХПБ профилактика катта инспектори А.Акрамов ва бошқаларга нисбатан Жиноят кодексининг 230-1-моддаси (Далилларни сохталаштириш (қалбакилаштириш) 2-қисми “а” банди билан жиноят иши қўзғатган ҳолда алоҳида иш юритувига ажратилган.

2026 йил 29 апрелда Лочинбек Тошпўлатовга сиртдан айб эълон қилиниб, “қамоққа олиш” тарзидаги эҳтиёт чораси қўлланган ҳолда у қидирувга берилган. 30 апрел куни эса Ш.Иззатуллоевга нисбатан “қамоққа олиш” тарзидаги эҳтиёт чораси қўлланган. Қолганлар жиноят иши бўйича гумон қилинувчи сифатида иштирок этишга жалб қилиниб, сўроқ қилинган.

Ҳозирда тергов ҳаракатлари давом эттирилмоқда.