Озарбойжон президенти: Стратегик ҳамкорлик Европага газ етказиб беришни икки баравар оширишни назарда тутади

Алиевнинг таъкидлашича, Озарбойжон жорий йилда 25 миллиард куб метр газ экспорт қилмоқчи ва бу ҳажмнинг ярмидан кўпи Европага йўналтирилади.

Фото: AP

Бокуда ўрнатилган энергетика бўйича стратегик ҳамкорлик 2027 йил охиригача Европага газ етказиб беришни икки баравар оширишни кўзда тутади. Бу ҳақда Озарбойжон президенти Илҳом Алиев Европа сиёсий ҳамжамиятининг 4-саммити доирасида Оксфордда бўлиб ўтган «Энергетика ва коммуникациялар» мавзусидаги давра суҳбатида сўзлаган нутқида айтиб ўтди.

«Агар 2021 йилда Озарбойжон газини Европага етказиб бериш ҳажми 8 миллиард куб метрни ташкил қилган бўлса, жорий йилда бу ҳажм тахминан 13 миллиард куб метрни ташкил этади. 2021 йилда экспортнинг умумий ҳажми 18 миллиард куб метрни ташкил қилган бўлса, жорий йилда бу кўрсаткич 25 миллиард куб метрни ташкил этади, бунинг ярмидан кўпи Европага йўналтирилади», — деди давлат раҳбари.

Президентнинг сўзларига кўра, саккиз давлат Озарбойжон газини олади: булар Европа Иттифоқига аъзо беш мамлакат, жумладан Болгария, Греция, Италия, Венгрия ва Руминия, иккита номзод давлат – Гуржистон ва Сербия, шунингдек, Туркия.

Алиев бир кун аввал Словения ва Озарбойжон ўртасида газ соҳасидаги ҳамкорлик йўлида муҳим воқеа бўлганини эслатди.

«Умид қиламанки, бир неча ой ичида биз Словения бозорига кира оламиз. Энди Европа интерконнекторлари лойиҳалари амалга оширилгач, Озарбойжон бошқа Европа давлатларига газ етказиб бериш учун кўпроқ имкониятларга эга бўлади», — деди у.

Давлат раҳбари энергетика соҳасидаги лойиҳаларга тўхталиб, Озарбойжон ишончли етказиб берувчи эканини таъкидлади.

«Деярли йигирма йил давомида биз қўшниларимиз билан биргаликда тарихда биринчи марта Каспий ва Ўрта Ер денгизини боғлайдиган қувур линиясини ишга туширдик ва фойдаланишга топширдик», — деди Алиев.

«Ҳозирда Туркиянинг Ўрта Ер денгизи бўйидаги Жайҳан портидан турли, жумладан, ўта нозик йўналишларга нефт етказиб берамиз. Баъзи мамлакатларда Озарбойжон нефти истеъмоли талабнинг эллик ёки ундан кўп фоизини ташкил қилади. Уч йилдан ошиқ вақт мобайнида биз муҳим газ етказиб берувчига айландик», — дея қўшимча қилди давлат раҳбари.