Суд “Навоийазот”нинг Рақобат қўмитасига қарши шикоятини рад этди

Рақобат қўмитаси минерал ўғитлар бозорида устун мавқега эга “Навоийазот” АЖни 2021-2023 йилларда биржадаги нарх манипуляциялари орқали 20,5 млрд сўм асоссиз даромад олганликда айблади. Компания бу айбловни рад этиб, судга мурожаат қилди, ҳолатни ўрганиб чиққан суд шикоятни қаноатлантирмади.

Фото: "Навоийазот" АЖ

Тошкент туманлараро маъмурий суди “Навоийазот” АЖнинг Рақобат қўмитасининг қарори устидан шикоятини кўриб чиқиб, рад этди.

Рақобат қўмитасига кўра, минерал ўғитлар бозорида устун мавқега эга “Навоийазот” юқори ликвидли ва монопол турдаги маҳсулотларни биржа орқали сотишда нархларни манипуляция қилган.

Жумладан, жамият томонидан 2021-2023 йилларда минерал ўғит (карбамид, сулфат аммония, суперфосфат), поливинилхлорид (ПВХ) ва формалин маҳсулотларини тегишли жадвалларда назарда тутилган муддатларда ва ҳажмларда (жами 57 209 тонна) биржа савдоларига қўймаган, оқибатда таклифнинг сунъий равишда камайтирилиши натижасида нархлар ўртача 10 фоиздан 50 фоизгача ошган.

Қўмитанинг қайд этишича, мазкур ҳуқуқбузарликлар натижасида жамият томонидан жами 20,5 млрд сўм асоссиз даромад олинган. Шунга кўра, монополияга қарши орган компанияга бажарилиши мажбурий кўрсатма берган.

“Навоийазот” АЖ Тошкент туманлараро маъмурий судига шикоят қилиб, Рақобат қўмитасининг бу қарори ва кўрсатмасини ҳақиқий эмас деб топишни сўраган.

Қўмита хабарига кўра, суднинг 23 июл кунги ҳал қилув қарори билан, компания шикояти рад этилган.

#биржа #Навоийазот #Рақобат қўмитаси